五歲女童臨臨懷疑被虐殺，廣男噚晚食完飯睇新聞，見到一篇喺網上廣泛流傳嘅「千字文」，聲稱由一個當日有份搶救臨臨嘅醫護人員所撰寫；呢個醫護人員喺搶救過程，見到臨臨瘦弱嘅身體上有受長期虐打所導致嘅瘀傷、有流血過後嘅「結焦」以及長期營養不良而導致嘅腹水等，醫護人員一直忍住眼淚為臨臨做心外壓，但最後都救唔番臨臨，醫護人員傷感地表示「對不起，哥哥姐姐救不了妳」。廣男唔明白，虎毒尚且不吃兒，點解有人會忍心向小童，仲要係向自己子女下毒手？

醫護人員強忍眼淚

睇到呢篇由醫護人員撰寫嘅「千字文」，唔好話係當時搶救緊臨臨嘅醫護人員，連睇到呢篇文章嘅廣男都要「忍住眼淚」；根據文章內容，果位醫護人員喺搶救臨臨無效、離開搶救室嘅時候，遇上臨臨生父以及後母，兩人臉上盡是輕佻、沒有一絲悔疚，令人更加氣憤。

而家案件已經進入司法程序，廣男唔敢下判斷話呢對生父、繼母有冇犯上謀殺罪，但佢哋有虐兒極可能係事實！廣男自己都係一個爸爸，有一個幾歲大嘅囝囝，就算平時見囝囝跌親繼而喊，廣男自己都會覺得好心痛，如果臨臨生父真係將臨臨拋上天花板撞頭或者打到藤條都斷，仲要係唔畀飽飯臨臨食。廣男認為呢種人唔適合做父母，更應該受到法律制裁。

引入強制通報 防悲劇發生

發生臨臨被虐打致死嘅悲劇，廣男覺得而家除咗要將虐打臨臨嘅人繩之以法之外，社會最緊要係防止再有悲劇發生。呢件事上面有冇任何單位有疏忽，廣男唔知道，但今朝聽電台節目，原來外國有一個所謂「強制通報機制」，即係教師、社工、醫生等專業人士，如果發現有懷疑虐兒個案，就要強制通報政府部門，否則就會承擔法律責任。廣男覺得呢個機制真係值得引入香港，以今次事件為例，學校其實有發現臨臨哥哥有傷，如果有強制通報，社署同警方就會介入，講真，如果臨臨父母最終係無虐兒，香港警察唔會屈佢囉！相反，如果佢哋有虐兒，強制通報可能就拯救咗一個兒童寶貴生命喇！

廣男囝囝早排因為玩腳踏車玩到「反車」，架腳踏車一啲「尖位」戳到囝囝塊面流血，第二日廣男帶囝囝番學，見到老師同老師講囝囝玩腳踏車整親，那位關懷小朋友嘅老師入到學校之後都問囝囝發生咩事，到放學時同廣男講，「你囝囝都話自己玩車唔小心撞親」，那名愛心老師用向小朋友發問嘅方式印證廣男囝囝無受虐待。有時候，如果教育工作者多走一步，對小朋友福祉以至身心健康都功德無量，呢啲亦都係「有愛」嘅表現。

原圖：網絡圖片