呢排社會新聞比較多，媒體嘅注意力唔少都落咗「一地兩檢」同埋新上任嘅律政司司長身上；不過，社會上有一單法庭新聞，其實都好值得大家關注，就係違法佔領一案，有九個被告包括戴耀被控「公眾妨擾」等罪名今日開始預審。雖然九個被告都無講過咩特別嘢，但觀乎佢哋仲要喺庭外高叫「抗議政治檢控、雨傘無罪、爭取民主無罪」等口號，再加上佢哋當中唔少人都講過唔會認罪，睇佢哋個款有九成都走數架喇。但係呢，佢哋之前明明「說好了」承擔罪責，而家疑似走數仲要高叫「政治檢控」，有啲前後矛盾喎！

目標崇高 都要守法

對於盲反派呢啲「佔中」被告到今日依然話畀人告係「政治檢控」，囍雨就覺得律政司司長鄭若驊喺2018年度開啟典禮嘅一番說話非常適用於回應佢哋。鄭若驊指出，任何人追求目標，無論理想有幾高尚同值得尊崇，行為都必須守法；而律政司進行法律討論時，唔會作政治考慮，就算如何艱巨，都必須作出法律上正確嘅決定而唔受任何干涉。

如果將鄭若驊呢番話套用喺違法佔領以至「雙學三人」刑期覆核等案件，就係有人犯咗法，律政司就算幾艱巨，甚至不受歡迎，都一定要作出正確嘅法律決定，例如起訴違法者、刑期覆核等。所以呢，九個「佔中」主事者畀人起訴，唔係咩「政治檢控」或者「政治打壓」，而係佢哋確實涉嫌犯法，而律政司以至警方，都只係依法執法。套用大律師公會前主席石永泰所講，都係「求仁得仁」啫！

公民抗命但唔找數？

講到呢度，囍雨又要Recap呢班盲反派成日講嘅「公民抗命」；「公民抗命」嘅精神，在於「違法達義」之後要坦誠承擔罪責以完成「抗命」最後一步，以彰顯佢哋係有承擔同埋有道德勇氣，但佢哋而家一個、二個想走數，根本唔係「公民抗命」，最多只係「公民搞事」。或者戴耀廷、陳健民以至朱耀明等人會覺得罪名「太重」，佢哋唔想認；但佢哋要知道，刑事檢控唔係政客「請客食飯」，鍾意「叫咩就叫咩」，唔通佢哋明明嚴重影響民生、經濟同埋市民生活，告佢哋最輕嘅罪名先叫啱數咩？

原圖：RTHK