嚟緊3月11日就係立法會補選嘅大日子，喺港島區盲反派有意派出「香港眾志」青年女將周庭披甲上陣，日前仲「群妖出動」，去灣仔出席周庭嘅造勢大會；囍雨唔知周庭係咪Hyper得濟，定佢真心無視法治，佢話過去一年香港面對各種政治打壓，仲話「民選議員被取消資格，企喺街頭嘅年輕人被關進牢獄」。大家都知，果班青年人唔單止企喺街頭，仲有動作多多，仲瞓街瞓咗79日，堵塞咗港島區交通大動脈，金鐘道、銅鑼灣購物區，仲有旺角核心區，周庭咁「輕描寫」，法治何在？仲有一點就係，佢哋「香港眾志」到呢一刻都仲講緊「命運自主」，即係係咪搞「港獨」或者「暗獨」先？

若非違法 又何須「重奪」？

周庭好、其他盲反派人士也好，佢哋成日話要「重奪DQ議席」，講到個議席係「屬於」佢哋嘅咁，其實囍雨覺得佢哋嘅論述或者前設都相當有問題。第一，有議席出缺，只要係合資格嘅選民都選得，冇話個議席屬於邊個嘅；其次就係，你哋幾條友自己玩嘢唔依法宣誓，搞到連個議席都冇埋，你哋仲好意思再出嚟選？選民點知你哋再入番議會唔會又玩啲咩呢？諗起都覺得危險！

至於年紀輕輕又邏輯混亂嘅周庭，如果佢真係要參選，但佢歪曲是非，唔承認被DQ議員或者「13+3」包括黃之鋒佢哋有違法，反而話「企喺街頭嘅年輕人被送進牢獄」，講到自己友完全無錯咁，呢種視法治如無物嘅盲反派年輕人，叫啲選民點選得落手？如果選民願意投票而且「送」咗周庭入議會，佢會唔會步羅冠聰後塵，唔係拒絕宣誓就喺立法會亂衝亂撞？呢班人話要「守住立法會」，囍雨話佢哋想「攻陷立法會」就真！

「攻陷立法會」？

仲有一點，就係「香港眾志」到今日依然鼓吹或者煽動緊「命運自主」，即係係咪想搞「港獨」都未搞清楚，投票畀佢哋？會唔會變成翻版「梁游」呢？囍雨唔係老屈「香港眾志」，佢哋上年成立時以「自決」為綱領，當時主席羅冠聰就表示，唔認為「港獨」喺香港具備可行性，但唔排除喺2047年如果香港可成功「自決前途」，「港獨」將會係其中一個選擇。講到咁，即係話而家唔「獨」，將來可能「獨」，甚至係「有得獨，梗係獨」啦！要投票畀「暗獨」派？No Way！

原圖：RTHK