曾幾何時，時事評論員、前中策組顧問練乙錚嘅文章畀盲反派支持者「捧」到天咁高，好多人都拜讀佢嘅文章然後都「化作己用」，但自從佢愈來愈激，甚至語無倫次嘅時候，佢嘅影響力已經江河日下，甚至係冇人去理。唔知係咪因為好想有Noise，練乙錚決定語不驚人死不休，喺《紐約時報》撰文，否認香港自古以來都係中國領土，又話香港係「被成為」中國殖民地咁話，甚至推到秦始皇時代去講。呢啲所謂論述，當然唔係學者所為，唯一睇到嘅只係佢係想藉文章直線支持「港獨」。

香港是中國殖民地？

根據練乙錚嘅講法，香港一直都屬於南方、即係嶺南地區，只係因為秦始皇發起嘅一系列軍事征服，嶺南先第一次被併入中央帝國。其實，練乙錚呢個講法都相當可笑，如果呢種講法成立，其實佢甚至可以話億萬年前連中國都係唔存在，又或者話美國同加拿大係屬於印第安人部落都仲得添；套用佢嘅邏輯，會唔會好容易出現「無窮後退」嘅情況，追源溯本，地球根本唔係屬於人類，而係屬於微生物，或者地球喺宇宙大爆炸前根本唔存在呢？

根據香港歷史學會會長呂元驄嘅說法，香港同內地向來都係緊密接觸交往，例如中國人用筷子食飯，香港人唔係用匙或者用手食飯，以至大家都講禮義廉恥等等，呢啲咪歷史文化傳承囉！事實證明，香港人根本就係中國人，唔係乜嘢殖民。練乙錚講咁多嘢，根本就係想為「港獨」提供似是而非嘅所謂論述，認真可恥。

製造香港獨立的論述？

囍雨唔知道練乙錚點解無啦啦要寫啲咁嘅「膠文」，但佢話晒係有頭有面、掛住學者牌頭嘅公眾人物，好心佢畀返幾分薄面自己，唔好做埋晒啲丟人現眼嘅傻事出嚟啦。呢啲說法都講得通，咁囍雨話地球係屬於恐龍都得啦。老老實實，練乙錚與其轉彎抹角，不如直接話「香港獨立」仲好啦，等香港人睇清楚佢真面目，支持佢、反對佢，大家釋隨尊便，至少唔好再侮辱「學者」兩個字，有辱斯文呀。

原圖：RTHK