素有「長洲覆核王」之稱嘅郭卓堅，以往成日提出司法覆核，由於冇道理可言，又成日失敗，搞到連法援署都按法例幾年內拒絕受理佢申請法援去司法覆核。但呢個人仍然不知悔改，最近佢又有新搞作喇，提出覆核話港府放棄西九高鐵站嘅司法管轄權有違《基本法》，仲話特首林鄭月娥無擁護《基本法》，要求法庭DQ（撤銷其職務）林鄭添。其實，全國人大常委會都講咗「一地兩檢」安排無違反《基本法》啦，到底郭卓堅知唔知自己講咩架？

「一地兩檢」不影響高度自治

對於郭卓堅話「一地兩檢」決定影響本港高度自治、行政管理權以至獨立司法權等，囍雨係絕對唔贊同。雖然高鐵西九站將會劃為內地口岸區，但綜觀香港整個格局或者管治，高鐵站內部分區域劃為內地管制區，根本唔會影響高度自治、司法權等等。郭卓堅到今日都仲可以入稟或者提出司法覆核，其實已經係香港司法無損嘅絕佳例子啦！

至於郭卓堅話林鄭無擁護《基本法》，郭卓堅有冇搞清楚《基本法》係咩一回事先？國家恢復對香港行使主權時，係根據國家憲法決定成立特區，所以先會有香港特別行政區以至《基本法》存在；而《基本法》由全國人大代表制定，人大有制定、解釋等權力，如果人大常委會就「一地兩檢」或者《基本法》作出咗決定，而林鄭表示反對，咁林鄭先有可能係無擁護《基本法》。

郭卓堅沒有弄清事實

事實上，港府以至林鄭要求嘅「一地兩檢」方案，其實人大常委會作為國家嘅最高權力機關，都已經講到明無違反《基本法》，而且《基本法》第7、第118以至第119條都有為有關決定提供法律基礎，即係林鄭並無唔擁護《基本法》，郭卓堅唔搞清楚事實就入稟，係咪有啲亂嚟呢？

囍雨其實唔係好明白，點解郭卓堅好多時明知自己無理據、無勝算都要提出覆核，雖然提出司法覆核係市民挑戰政府行政決定嘅權利，但如果有人濫用制度，法庭以及公帑受到影響，受損嘅最終都係香港市民。仲有，如果郭卓堅認為宣誓無效、無真誠擁護《基本法》就要DQ，咁佢應該好贊成法庭DQ六個前議員，包括佢有Buy嘅社民連梁國雄啦？下次有議員拒絕/忽略誓言，囍雨留名睇佢出手！

圖片來源：香港電台即時新聞