2017年剛過去，唔同媒體都為過去一年「埋單計數」，「雙學三人」黃之鋒、羅冠聰同埋周永康作為「風頭躉」，當然會同媒體做專訪啦！囍雨前兩日睇到《生果報》有篇黃之鋒佢哋嘅專訪，黃之鋒話當務之急係要「打一場最好嘅復仇戰」，即係嚟緊三月嘅立法會補選中勝出。復仇？復咩仇呀？冇人明喎，無論係你黨友羅冠聰，定係其他DQ前議員，甚至係「雙學三人」同「新界東北十三犯」案都好，全部都係你班人違法在先，求仁得仁承受惡果，到底有咩「仇」好報呢？

違法者被「英雄化」

香港有嘅，就係新聞自由。唔同媒體喜歡點樣回顧2017年，自然有自由去決定，不過如果你問囍雨點睇盲反派喉舌傳媒總結2017年嘅手法，一言以蔽之，咪就係「英雄化」違法者囉！明明有人違法，你話係政治打壓；明明係依法辦事，你話係政治決定。好似《生果報》日前同黃之鋒佢哋做專訪咁，幫佢哋嘅違法行為塗脂抹粉之餘，仲話要向「雙學三人」致敬，真係唔到你唔服！

講番黃之鋒嘅「復仇」論，用字講到咁激昂，相信唔少盲反派支持者都會相當之受落，不過，囍雨就覺得佢嘅所謂「復仇」，其實係無「仇」可報嘅，點解？原因非常之簡單，無論係佢老友羅冠聰因為拒絕／忽略誓詞而被取消議員資格，抑或係佢哋「雙學三人」因為衝擊政總被定罪，繼而被刑期覆核都好，其實呢啲事件入面，都係佢哋自己本身有違法行為在先，請問佢哋報咩仇，同埋向邊個報仇呢？

又是為了選舉？

其實，黃之鋒喺專訪尾段都「點咗題」，話今年3月11日嘅立法會補選就係所謂嘅「復仇戰」；講咁多嘢，原來都係為咗選舉！係喎？差啲唔記得黃之鋒所屬嘅香港眾志想派個Nobody出嚟選添。查實臨近選舉，各黨派有動作一啲都唔出奇，不過就絕對唔係黃之鋒所講「香港眾志會盡全力取回原本屬於我哋嘅議席」。議席係屬於香港眾志？你節省少少啦！議席係屬於香港市民架！香港市民依法選出會依法宣誓嘅人做議員，唔係選出宣誓玩嘢「玩自爆」嘅人囉。想當日羅冠聰選擇拒絕／忽略誓詞嘅時候，佢有冇諗過自己辜負咗選民嘅期望呢？

喺呢度，囍雨要呼籲選民作出投票決定前要非常小心，尤其係想支持本土派或者激進派，因為呢班人唔單止可能係「暗獨派」支持「港獨」，係咪願意擁護《基本法》或者宣誓會唔會玩嘢都未知；最弊就係，萬一畀佢哋選到入立法會，其實佢哋最大機會做嘅，就係不停衝擊！大家作為「聰明選民」，真係要識揀！

原圖：RTHK