周日坐喺電視機前，聽到某壹傳媒既老闆喺城市論壇上聲稱，「佔中」舉行嘅「全民投票」較民意調查公信力更高，更能反映民意喎。聽到呢壹位傳媒老闆咁講，囍雨即時心諗，如果投票程序同身份核實方面做得夠嚴謹嘅話，佢呢番說話都仲可以話無錯嘅，但問題係以電子投票平台為主嘅「佔中投票」本身就漏洞多多，重覆投票同埋幫人投票亦話都無咁易，就連一啲未夠秤既人都投到。學互聯網專業協會會長洪為民咁講，根本就量化唔到香港合資格選民既意見，咁點叫得上公信力呀？
 
「佔中投票」公信力高？咪玩啦！
 
相反，過往由唔同機構所作出嘅民意調查都顯示，「佔中」不得民心，早就有超過一半市民站喺「佔中」嘅對立面，至於表示支持嘅，就由頭到尾均徘徊喺兩成多少少嘅低位。咁既調查結果，同「佔中」主事人宣稱大眾開始了解「佔中真義」嘅講法啱啱好呈現相反走勢。講真句，單一民調嘅結果你都仲可以死撐話存在偏差，但當每一個機構嘅民調都得出相同結果嘅時候，公信力會比嗰個所謂「全民投票」差咩？傳媒大老闆同「佔中」主事人點解又可以當睇唔到呢？
 
最新民調仍顯示超過一半人反佔中
 
就以最新披露嘅一份政府內部民調做例子，「佔中」嘅支持率已經升到53%嘅歷來高位，至於愛與和平的包裝就更加係「得啖笑」，多達63%嘅受訪者唔認為「佔中」主辦者有能力控制「佔中」秩序，另更有67%人預計「佔中」會發生暴力事件。嘩，呢啲市民嘅看法，同「佔中」所強調嘅「非暴力」，真係差十萬九千丈遠囉！
 
如果嫌民調數字唔夠具體，咁大家就再睇睇事實啦！喺本月中嘅立法會門外，一幕又一幕令人睇到心驚驚嘅暴力衝擊畫面，相信大家都仲係記憶猶新，當時正正係一小堆激進示威者搞事就令秩序失控，令成件事都變得好暴力。就好似保安局局長黎棟國早前引述《辭海》嘅解釋，「佔領」根本就係「以強力取得地理空間，用強力奪取領土、陣地」。囍雨係度想問一句，一個掛上「佔領」牌頭嘅行動，又有乜可能可以確保秩序維持同埋唔發生暴力事件先？
 
有個別人士可能覺得，就算「佔中」唔獲得支持，就算「佔中」會出現暴力，但只要最終可以迫到中央喺香港政制發展中讓步，都算係勝利啦？不過，民調亦都顯示咗抱住呢種想法嘅人係少之又少，只有唔夠8%嘅受訪者覺得「佔中」可以成功令中央讓步。
 
反對呢個「有害無利」嘅佔領行動，喺社會之間睇嚟已逐漸形成共識，廣大港人應該都喺時候諗諗，我哋應點樣主動啲嗌停「佔中」啦！

原圖：takungpao