臨近立法會補選，好多古靈精怪嘅事都會按二連三咁出現，例如本來唔激進嘅政客，會突然變得激進啦，又或者本來好低調嘅政客，都會變得好高調，甚至乎有啲浮誇。好似噚日咁，一向Sell務實嘅工黨，為咗推舉佢哋個新主席、計劃參加新界東補選嘅郭永健，近日都學人「衝入」政總示威。說時遲、那時快，噚日下晝就輪到另一個想參加新界東補選嘅中大學生會前會長張秀賢衝出嚟做Show，話要向疑似對手工聯會鄧家彪「下戰書」，要同人討論「一地兩檢」等議題。不過，挑機還挑機，張秀賢好似連對方啲基本資料都搞錯喎，話晒都想參選立法會，張秀賢可唔可以認真啲呀？

張秀賢論述差、資料錯

叫人公開辯論本來都係幾型嘅事嚟，不過張秀賢啲論述明顯就麻麻哋，甚至連基本資料都搞錯喎。首先，張秀賢話要保住民主派議席，已經畀鄧家彪喺社交媒體「秒殺」佢，話個議席本來就唔係屬於民主派嘅。冇錯吖，議席點會話預早留畀某派別嘅人架？連少少民主同選舉理論都唔識，張秀賢真係節省少少啦。仲要喎，張秀賢話喎，鄧家彪喺中大讀碩士嘅時候係跟「違法佔領」發起人陳健民寫論文，大家都係中大人又乜又物，點知最後又係畀鄧家彪「KO」。原來，陳健民係鄧家彪學士論文嘅導師，並唔係乜嘢碩士論文導師。連基本資料都搞錯，仲有公開挑人機喎，張秀賢真係好肉酸囉！

唔知係咪因為張秀賢太「傻豬」嘅關係，搞到喺佢自己Facebook都有唔少網民忍唔住串佢，有網民話張秀賢「拉人裙蓋自己腳，借人聲勢壯己膽」，直斥佢借人過橋、走捷徑；又有網民笑張秀賢「比人反咬一口」、「間接幫人宣傳」。如果勇於挑戰他人但搞到自己變成笑柄，張秀賢不如唔好搞咁多嘢算啦。

贏面低欲出奇制勝？

相比曾做過立法會議員嘅新民主同盟范國威，或者有主流盲反派支持嘅工黨郭永健，張秀賢跑出線嘅機會確實係比較低嘅，所以佢想「出奇招」搏出位，都係唔出奇嘅事。事實上，如果係主流盲反派支持者，根本唔會支持張秀賢；至於本土派支持者，囍雨都唔覺張秀賢值得支持。因為囍雨極度懷疑，張秀賢呢個較親近本土派嘅政客，都係啲「叫人衝、自己縮」嘅政棍。囍雨有個朋友素來係盲反派支持者，喺2014年違法佔領行動前一段時間，有盲反派人士曾經發起過包圍禮賓府行動，呢個朋友喺呢場示威行動中見到張秀賢全程攞住個電話縮埋一邊，事後佢同囍雨講，呢個張秀賢，啲表現點睇都唔似係學運領袖！

倘若張秀賢僥倖喺盲反派初選勝出，囍雨都唔知恭唔恭喜盲反派好，事關張秀賢仍然有案在身（有關違法佔領嘅刑事案件），分分鐘選到都無用；而且曾經成立組織「立言香港」嘅張秀賢，當時宣揚埋啲「經濟自主」、「體制自強」、「社會自治」嘅「暗獨」概念，萬一佢話唔支持「港獨」，轉頭又變卦認自己係「港獨」友，會唔會參選變DQ架？

原圖：RTHK