政府總部東翼前地、即係盲反派所指嘅「公民廣場」，今日開始重新開放，主要作為行人通道，如要集會或者遊行就要事先申請，做法同三年前爆發「違法佔領」前差唔多。雖然政總都係啱啱重開，但有「聰明」政客就急不及待去示威，大家以為係激進派所為？錯喇，去集會嘅係一向行動上較為「溫和」嘅工黨，而其中一個帶頭人就係正參加盲反派初選想出戰新界東嘅工黨主席郭永健；咦咦，睇嚟為咗選舉，工黨都想變埋激進派喎！

集會、遊行要申請合理

老實講，囍雨其實就唔係太明白點解盲反派班人認為政總東翼前地一定要好似「無掩雞籠」咁。第一，政總東翼前地本身係政府物業範圍，你要去遊行、集會，事先申請好合理。反正而家唔申請都可以去到政總外圍，你要入裡面示威，需要向政府申請真係好唔合理咩？第二，經過反新界東北衝擊立法會，以至「違法佔領」等違法事件，如果唔做好啲申請同保安工夫，政總容乜易變咗隨時畀人衝擊嘅「罩門」？明明係盲反派班人玩串個Party，仲問人點解示威、集會要申請，係咪有啲可笑呢？

至於工黨，尤其係新當選做主席嗰個郭永健，平時十年唔見佢上一次新聞，而家突然「走到咁前」去示威，唯一諗到嘅原因，係因為「選舉來了」，佢為咗跑出線近期就一定要大大增加曝光率；所以之前盲反派反對修改《議事規則》，喺立法會外集會就算得「小貓」三、四隻，睇新聞都見到郭永健坐定定喺度。

工黨「不工作」？

如果講選舉，囍雨梗係唔係專家啦，不過話晒留意時政新聞咁耐，身邊又有唔少盲反派朋友，其實工黨支持者（新界東）之所以願意支持工黨代表張超雄等，唔多唔少都係因為工黨表面上夠晒務實同支持弱勢社群。既然工黨而家要派出郭永健出嚟爭新界東個補選議席，好應該做番「老本行」，借機宣揚下勞工或者扶助弱勢嘅政策。而家郭永健走出嚟一係就反對市民都支持嘅修改《議事規則》，一係就衝個頭出嚟「突破防線」喺政總示威，咁即係工黨都唔做實事，玩「務虛」、玩抗爭？

可以預計得到，喺未來一段時間，盲反派會繼續有政客唔申請就去示威、集會，但囍雨提醒呢班政客，自己唔守規矩，萬一又發生啲咩衝擊、違法事件，到時唔好又亂屈人「政治檢控」同「政治打壓」呀！

原圖：工黨Facebook