政府聽日就會重新開放政府總部東翼前地（盲反派稱為「公民廣場」），三年前因為衝擊呢度而被上訴庭判監幾個月嘅黃之鋒，直到今日都唔肯承認自己做錯，仲話如果當年唔係圍封果度，就唔會有佢哋嘅「重奪公民廣場」事件，之後亦未必有「違法佔領」咁話喎。嘩，呢度咪就係典型「強盜邏輯」囉，換個通俗少少說法，即係「唔係你收起個銀包，我又駛乜夾硬搶呢？！」，咁講合唔合理先？做錯就永遠係人哋，自己就一定冇錯，呢啲咪就係香港盲反派囉。

因為被衝擊 才會要圍封

喺黃之鋒等「逢政府必反」嘅人眼中，政府無論做得幾「啱」都好，最後因為政治理由都會係做「錯」。例如當年政府決定圍封政總東翼前地，囍雨喺度必須講清楚當年政府要圍封上址嘅理由。事實係，經歷反國教、免費電視發牌風波，以及立法會審議新界東北前期撥款變成衝擊事件後，政府發現上址如果唔做好保安工作，政府總部保安風險會相當高。老老實實，唔想政府部門變成「無掩雞籠」，其實非常正常，你試吓唔申請突然走入美國白宮範圍，睇睇會點？美國特勤局隨時成堆人衝出嚟拘捕你啦！

至於黃之鋒所謂嘅「重奪公民廣場」事件，到底黃之鋒係善忘，定坐監坐到頭昏腦脹？所謂「重奪」行動，其實一啲都唔和平，上訴庭判詞講得好清楚，事件搞到有10個保安受傷！而家施暴者調轉槍頭指責「受害者」，講法公唔公道先？仲有，如果黃之鋒認為無呢單嘢違法佔領都未必會發生，咁佢係咪間接承認自己係違法佔領嘅其中一個始作俑者？咁佢連埋喺「違法佔領」期間嘅所作所為，佢無理由唔畀人告「公眾妨擾」架喎！

只為罪行開脫

退一步講，囍雨覺得就算當年政總東翼前地冇畀圍欄圍封，黃之鋒等人一樣可以有其他違法衝擊行為；大家諗下，如果圍封咗嘅地方黃之鋒等人可以聲稱係屬於市民所以可以強闖，其實佢哋衝埋入政府總部，然後話政府總部都係屬於市民都得架喎！黃之鋒呢種「無圍欄，就唔會有違法事件」嘅事後假設，其實都唔係好站得住陣腳，喺佢哋眼中，只要係有政治理由，基本上係做乜都得嘅，如果唔係又點會又違法佔領，又有刑事藐視法庭等案件呢？

查實講咁耐，黃之鋒係咪都係只係想為自己嘅罪行開脫，話畀人聽佢哋衝擊政總無罪呢？如果係嘅，黃之鋒不妨講得明白啲，話畀人聽盲反派犯法都冇問題啦！

原圖：Takungpao