不同媒體噚日盛傳律政司司長袁國強已經辭職，仲話將會由資深大狀鄭若驊接任律政司司長一職。可能盲反派太過唔喜歡袁國強嘅關係，個別媒體以至政客喺政府都未證實有關消息嘅時候，就急不及待為袁國強「埋單計數」，有媒體以「割地自閹」、「政治檢控」形容袁國強，而公民黨立法會議員楊岳橋，就聲稱袁國強未能「真正捍衛法治」、「政治先於法律」云云。但係，呢啲係咪事實呢？到底袁國強係未有捍衛法治，定係太堅定於捍衛法治，令到盲反派不斷攻訐佢？

弄清DQ、刑期覆核案本質

其實盲反派講嚟講去，主要都係話袁國強唔應該提出司法程序令到有議員被法庭宣布失去議員資格，同埋唔應提出刑期覆核令到「雙學三人」等要坐監。從盲反派嘅角度睇，佢哋可能會覺得係袁國強以至其他律政司係「政治先於法律」，不過如果大家行近啲、睇真啲，會發現無論係DQ案好、刑期覆核案件也好，基本上袁國強、律政司都係依法辦事，絕對符合法治精神。

以DQ案為例，事情嘅本質，係真係有前議員宣誓果時拒絕或者忽略誓言，喺尊重法律、有責任執行《基本法》嘅情況下，袁國強提出法律程序要求DQ呢啲議員，根本就唔係咩政治行動，而係依例執法；盲反派唔批評宣誓「玩嘢」嘅自己友，掉番轉攻訐執法者，公平咩？至於「雙學三人」案甚至「反新界東北」案，其實上訴庭嘅裁決，已經印證咗袁國強、律政司完全依法辦事。所以，囍雨實在睇唔到袁國強「冇捍衛法治」！

不向盲反派執法 才是法治嗎？

其實呢，盲反派嘅道理，Sorry應該係歪理先啱，其實非常之簡單，佢哋一直高舉守護法治嘅旗幟；不過，一到咗盲反派人士被捕、被告嘅時候，不論呢啲人係咪真係觸犯咗法律，盲反派好多時都會批評係政府、檢控部門「政治打壓」佢哋。換個角度講，如果有人因為政治理由犯法而唔駛被告，咁囍雨就認為袁國強以至律政司冇捍衛法治喇。

其實，律政司司長就係一個「豬頭骨」位，只要盲反派稍為唔滿意，就會一枝枝箭「射過嚟」；幸好，袁國強到今日都冇退縮過，如果唔係正義就難以得到彰顯。囍雨想喺度講句，袁司長，辛苦晒！

原圖：Takungpao