噚日環保組織「綠色和平」一班成員爬上中環摩天輪掛起「夠鐘走塑」橫額，要求政府正視塑膠污染問題，不過由於橫額畀大風吹爛，行動以「失敗」告終，而當中19人就畀警方以涉嫌《公眾妨擾罪》拘捕。喺呢個「抗爭當食飯」嘅年代，「綠色和平」嘅行動連素來支持抗爭嘅網民都唔多支持。其實，「綠色和平」呢種「創意抗爭」雖然吸引到「眼球」，但始終都係太危險喇！下次要示威，安全啲會唔會好啲呢？

記憶中的創意抗爭

喺廣男仲係讀緊大學嘅時候，教社會科學嘅老師就曾經邀請「綠色和平」嘅負責人嚟學校講「抗爭」，當時佢哋負責人就講「綠色和平」會用一啲有「創意」嘅抗爭手法表達訴求，對於當時仲係廿歲左右嘅廣男嚟講，都覺得呢種想法幾新奇，既得到人注意，甚至可以令唔同地方嘅政府正視環保訴求。

不過，睇番近年「綠色和平」嘅行動，唔少所謂有「創意」嘅抗爭手法，好多時都係啲成員或者義工危險地爬上唔同地方掛橫額；創意就有喇，但會唔會危險咗啲呢？好似今次「綠色和平」啲成員爬上中環摩天輪咁，雖然話啲成員本身有專業訓練，但萬一出咗事，咁點算呢？又或者如果爬上摩天輪嘅時候影響到摩天輪結構，會唔會令到其他人有危險？又或是如果連累到其他人，甚至令消防員警察等發生無辜的意外，更加不必要了吧？

不應以危險手法表達訴求

其實，當「綠色和平」不斷用危險手法表達訴求，除咗成員或者周邊人士有危險之外，市民唔多唔少都已經對呢啲行動「司空見慣」或「深感討厭」，結果反而難以喚起公眾關注，吃力不討好，更背負風險隨時畀警察拉。廣男就建議，如果「綠色和平」或者其他環保組織要表達訴求，不妨用一啲合法又唔危險嘅活動，如果覺得唔夠吸引，亦不妨喺網上面做多啲Campaign，等多啲人關注仲好啦！

雖然呢篇文章點題「創意抗爭」已Outdate，但囍雨講Outdate嘅意思，唔係話「創意抗爭」已經Outdate，而係以危險方式作出嘅抗爭行為已經不適用；因為冇人願意見到示威者為咗表達訴求而有危險，更不想這些行動連累到其他人無辜受傷甚至死亡！其實，好多人諸如廣男都好支持環保理念，但環保團體都應該多多保重，萬一發生咗意外，有人命傷亡就唔好啦！

原圖：RTHK畫面截圖