早前「港專」舉行畢業禮，喺播國歌嘅時候幾名社工系畢業生拒絕肅立，兼且做出交叉手勢，結果畀校方趕走。港專校長陳卓禧事後苦口婆心解釋原因，不過班畢業生依然好唔滿意，仲寫咗封聲明書繼續「追擊」學校。綜觀呢班社工系畢業生嘅聲明，明顯係歪理多多、道理欠奉，明明自己違反畢業禮規則在先，畀人驅逐就拉到《國歌法》上面，老屈學校「未立法、先執法」，對於唔尊畢業禮兼侮辱國歌就輕輕帶過，「搬龍門」Feel非常之重！

這是尊重問題

正如班畢業生自己所講，畢業禮嘅場地規則都寫明如有任何唔尊重國歌嘅不當行為，有關同學係唔可以上台參加頒授儀式嘅。校方一早有言在先，不容許出現唔尊重國歌以至場合嘅行為，班畢業生明知規定而要違反，咁仲要話執行規矩嘅學校？成件事根本同《國歌法》冇直接關係，校長接受訪問時都講，係汲取咗去年畢業禮經常同近日社會情況而作出呢個安排。問題嘅癥結，一直都係有畢業生唔尊重自己嘅畢業禮，畀人驅逐簡直係天經地義。

至於話校方處理手法不當，讓學生面對「無形威脅」，老老實實吖，請問你班人受到咩嘢威脅咁巴閉呀？驅逐你離場，又冇過唔畀你畢業，正如陳校長所講，唔會因為政治立場而剝奪學生接受教育權利，只要唔係一心「搞事」，甚至畀埋入場票啲記者「扮家人」入場，邊個可以「威脅」到你呀？一班學生早有預謀要鬧事，仲要帶埋以「家人」身份潛入會場嘅盲反派記者採訪，會唔會係佢哋對學校「威脅」更大呢？

不是政治審查

此外，呢班社工系畢業生邏輯真係好混亂，佢哋話校長話佢哋「揀錯學校」，好似入讀先決條件係認同、跟從愛國愛國理念；嗱，呢個咪又係老屈囉，陳校長明明係叫佢哋守規矩，即使政見不同都唔可以侮辱國歌，要尊重每一個國家、每一首國歌，講到尾都係要佢哋學「尊重」咋。入學先決條件？你班人業都畢埋啦，唔好自打嘴巴啦！

計囍雨話齋，如果班畢業生既然咁不滿，又話港專「打壓」、「政治凌駕教育」等等，又話要力抗不公打壓，囍雨建議佢哋喺校方一日未有佢哋滿意嘅答覆之前，一日都唔好攞畢業證書，實行抗命到底！

原圖：Wenweipo