立法會成功修改《議事規則》，市民普遍都表示支持，不過盲反派就頻頻出口術，係咁為「拉布」失敗搵藉口。今日囍雨打開報紙，見到已經冇做立法會議員一排嘅公民黨主席梁家傑撰文，心諗呢個政壇老手，又係大律師公會前主席，內容點都有啲份量吖，誰不知一睇；嘩，啲謬論真係多到數唔晒；講到尾，佢喺最後原來係叫人補選投盲反派一票，講咁假嘢去呃人，原來都係為拉票？好 SAD囉。

玩弄民調數據

梁家傑今日喺《生果報》篇文，題目係《示威變示弱的反省》，表面上篇文係話反省，其實就係為「拉布」失敗而賴三賴四。好似佢話喎，市民選擇沉默，唔等於冇意見，因為特首林鄭月娥喺港大民調嘅評分大跌3.2分咁話。既然要為阻止修改《議事規則》護航，點解梁家傑唔引用相關數據呢？

可能梁家傑作為「大狀」，梗係搵啲「啱自己用」嘅數據啦，但講開修改《議事規則》，其實最相關嘅數據應該係早前由中大進行、有關「拉布」同修改《議事規則》嘅民意調查，調查結果清楚顯示較多市民反對「拉布」同埋支持修改《議事規則》，梁家傑係唔知定係扮睇唔到？與其話林鄭因為種種原因包括《議事規則》問題而評分下跌，不如直接承認市民好反對「拉布」好過啦傑哥！

樓價上升都關事？

至於梁家傑另一個論點，囍雨就覺得更加可笑；梁家傑話樓價持續節節上升，擁有物業嘅人傾向追求穩定，不願見到社會動盪都係人之常情。調番轉講，唔係應該話咁多人買唔到樓、未上到公屋，應該怨氣更加大，更加容易響應盲反派號召先啱咩？梁家傑無論數據、事例都錯誤引用到離晒譜，呢啲就係佢嘅大狀本色？更重要嘅係，如果佢都知盲反派有五成幾至六成選票選入立法會，但「拉布」完全得唔到支持，係咪應該反省下自己或者「隊友」嘅「拉布」行為先啱呢？

原來為選舉拉票

梁家傑講咁多嘢，其實都係有佢目的嘅，佢喺文章尾段就話香港人好好把握出年3月11日立法會補選嘅機會，將「民主派」參選人送入議會。原來講埋咁多歪論、謬論，就係提早為盲反派拉票！辛苦晒！

原圖：Takungpao