立法會大會早前成功通過修改《議事規則》，盲反派「拉布」無效、議會外面又缺乏支持，可以話大敗一場；有份參與「拉布」嘅公民黨黨魁立法會楊岳橋接受訪問時表示，盲反派之所以「失敗」，係因為未有因應晦澀難明嘅《議事規則》做好公眾教育，所以搞到民情冷淡咁話。對於楊岳橋呢番說話，囍雨認為佢只係「講啱咗一半」，民情冷淡甚至唔支持佢哋係真嘅，不過原因唔係佢哋教育得公眾唔好，而係公眾太清楚佢哋「拉布」行為嘅禍害！

民意昭昭難否定

楊岳橋聲稱未有對公眾做好教育，站於佢自己角度佢梗係覺得啱啦，不過囍雨就唔係好認同佢講法喇！的而且確，由輿論以至大學做嘅民調都見到，市民普遍都反「拉布」、支持修改《議事規則》，不過原因並唔係因為公眾唔清楚修改《議事規則》係咩事；相反，市民支持修改《議事規則》，係因為太清楚盲反派借舊有《議事規則》嚟「拉布」，搞到議會幾乎運作唔到，甚至連民生工程都要讓路，佢哋得唔到市民支持，先係合理嘅結果。

盲反派除咗唔能夠「間接」話公眾無知之餘，囍雨覺得佢哋亦都唔應該怪責建制派提出修訂，因為建制派咁做，根本就係順民意而行；而且，建制派亦都曾經伸出橄欖枝，表示願意同盲反派傾點樣修改《議事規則》，但盲反派好似係「想砌多過想傾」咁，人民力量陳志全更講過民意調查結果唔會影響佢哋行動，呢種為反而反、唔務實嘅行為，其實就係市民最唔想見到嘅事。

大家諗下，盲反派呢幾年點「拉布」、點阻礙民生？財政預算案，拉！版權修訂條例，拉！創新及科技局，拉！醫委會改革，拉！「一地兩檢」，拉！太耐之前嘅唔講啦，單單計二○一六至二○一七年度，政府提交給立法會嘅二十九個法案，只有十二個法案獲得通過，當中好多未能完成嘅提案都同香港發展息息相關。發展建設方面，工務小組經過多次「拉布」後，卒之通過咗1,300億港元工程項目，但到財務委員會審批時，「拉布」又繼續，最終令財委會只成功核批咗580億工程項目款額，財委會平均要4.2小時審批一個項目，較以往平均增加一倍以上。

盲反派「間接」話公眾無知，但囍雨覺得，市民唔支持佢哋，純粹係因為已經厭惡咗盲反派十年如一日嘅搗亂行為。

做代議士要認清事實

盲反派一直聲稱自己為「民主派」，囍雨就覺得作為「民主派」，如果睇唔到民情都係一件幾大鑊嘅事；以今次修改《議事規則》嘅議案為例，市民之所以咁支持都係因為睇唔過盲反派喺議會嘅所作所為，而諸如楊岳橋等「民主派」代表，如果仲以為佢哋自己冇問題，而只係市民「未了解」咩事嘅話，佢哋一係就係自己呃自己，一係就連民情、民心所向都搞唔清楚。如果「民主派」都唔能夠再代表到市民，你話係呢件事何其諷刺呢？

原圖：RTHK