三名台灣學者早前申請簽證來港參加論壇，兩個被拒發簽證，其中一個就係「鼎鼎大名」嘅吳叡人，佢之所以出名，並唔係因為佢「中央研究院台灣史研究所副研究員」嘅身份，而係因為佢嘅「台獨」立場；吳叡人喺香港都算有啲知名度，因為佢就曾經喺港大學生會刊物《學苑》專題報道「香港民族‧命運自決」裡面撰寫評論；一個鼓吹「港獨」、「台獨」嘅所謂學者，不斷煽動人民分裂中國固有領土，嚟香港時被拒入境，大家客觀啲去諗，其實有幾出奇呢？

港英政府打壓異己

至於另一位準備同行嚟港嘅台灣學者吳豪人仲好笑，佢受訪時話喎，「我過去佩服港英政府打造的法治社會 ……」，囍雨唔知吳豪人憑咩作出呢個判斷，不過囍雨睇佢對香港就唔係好熟；睇返可靠資料，喺港英年代，警隊設有政治部，呢個政治部唔單止對付親中人士，連右派組織，即係親台灣嘅人亦會跟蹤，，必要時更加會遞解出境，甚至會用入境政策控制國民黨人士入境。尤有甚者，有研究亦都指出前摩星嶺集中營（「白屋」）關押過國民黨特務。

史實就係史實，港英政府以往對冇威脅嘅親台人士都會對付，又何來吳豪人口中值得佢佩服嘅社會呀？講到港英政府咁「法治」，吳豪人唔係無知，就係太天真、太傻囉！

吳叡人為何許人

吳叡人被拒入境，盲反派如獲至寶，但吳叡人係咩來頭呢？根據《生果報》介紹，港大學生會2014年編輯出版、鼓吹「港獨」而引起香港社會群起指斥嘅《香港民族論》，吳叡人正正就係作者之一，佢嘅文章題目叫《The Lilliputian Dream：關於香港民族主義的思考筆記》，提出香港民族主義已經興起，原因係香港回歸之後，中國官方國家民族主義目標將香港整合到「單一國家」之內，令到香港本土社會抵抗同反擊。

睇完上面呢段介紹，唔駛問都知吳叡人唔單止係支持「港獨」，直頭算係大力煽動「港獨」嘅人，香港唔畀吳叡人等入境，係咪人之常情呢？可能吳叡人等人「覺得」自己做嘅只係「學術交流」，但如果純粹係「學術交流」，又點會一而再、再而三談論到香港獨立呢？

老實講，囍雨真係好討厭以「學術為名，播『獨』為實」嘅行為，尤其係香港以外嘅人嚟香港或者喺當地引起「港獨」論述，所以囍雨覺得唔畀佢哋入境香港，係最正確不過嘅事！換轉係港英政府，囍雨諗佢哋一樣入唔到境，就算入到，唔畀人捉入「白屋」，都絕對有可能被遞解出境啦！

原圖：crntt