每逢年尾，又係盲反派開始搞元旦「大」遊行嘅時候，點解囍雨要括住個「大」字？事關佢哋呢幾年搞遊行、示威搞到市民都唔多想理佢哋，所謂嘅「大」遊行，其實真係愈來愈縮。好似老牌「大」遊行搞手民陣咁，佢哋今年遊行「主題」極為分散，一時又話反修改《議事規則》、一時又話反「一地兩檢」，但偏偏呢兩項主張都係同民意背道而馳，咁到底佢哋仲可以講到「出師有名」咁嘅？唔通真係唔知「醜」字點寫？

遊行主題與違背民意

民陣嚟緊嘅所謂遊行，「主題」眾多，除咗之前提及嘅反修改《議事規則》、反「一地兩檢」，仲有反《基本法》23條立法、反「政治打壓」，甚至「反規劃發展」等等都有，但大家諗真少少，其實全部「對錯焦」！以反對修改《議事規則》為例，早前有大學民調顯示，普遍市民其實都唔認同《拉布》、支持修改《議事規則》，民陣或者盲反派係咪唔理會民意，仲想騎劫民意話市民反對修改《議事規則》呢？

又以「一地兩檢」為例，民陣將「一地兩檢」形容為「割地兩檢」，囍雨先唔討論香港土地屬於中央，何來「有地何割」；其實同修改《議事規則》一樣，大部分市民都支持「一地兩檢」，咁盲反派要借反「一地兩檢」嚟向市民「集氣」，其實佢哋係咪向市民「宣戰」，誓要盲反市民支持嘅民生項目呢？諗到呢度，囍雨真係希望盲反派或者民陣諗清諗楚，到底係要企喺市民一邊，定係政治利益一邊。

遊行有權 扣帽子無理

本來任何政治取態嘅香港市民，根據《基本法》都享有遊行、集會等嘅權利，就算係小眾都好，都可以表達自己政治訴求，冇所謂架，等香港市民知道社會有其他睇法吖嘛。只不過咁，盲反派成日搞住「民意」旗號、成日話自己代表香港民意，咁即係佢哋爭取同表達嘅係「大眾意見」啦，但而家事實明顯唔係咁，試問佢哋所搞嘅「遊行」，仲有咩認受性可言？與其講大話呃市民自己係多數，不如老老實實承認自己係「事事盲反」，呼籲同路人出嚟撐佢哋，咁仲可以贏得少少咁多尊重囉。

原圖：RTHK