港區全國人大代表選舉會議主席團確認咗49人合資格成為港區全國人大嘅候選人，另外有10人唔符合資格，其中冇簽署確認書、冇被列入候選名單嘅公民黨立法會議員郭家麒，就指控選舉「連任何競選、戲都唔做」、「設咁多門檻進行預選」，擺出一副覺得選舉唔公平嘅姿態。囍雨真係好想回應郭家麒，其實你自己要參選人大呢啲國家機關，但連國家憲法都唔想擁護咁，擺明係做騷啦！

參選人大但不擁護國家？

選全國人大代表，即係想參選做國家立法會機關嘅其中一員，既然要加入國家機關，咁參選嘅時候要作出聲明，擁護國家憲法、香港特區《基本法》、「一國兩制」同埋效忠香港特區，其實都相當之合理。郭家麒要參選人大代表，但又唔肯簽名效忠國家憲法同特區，呢個係咩玩法？佢係咪想話畀人知，佢又要參選國家機關，但又唔會效忠國家憲法咁矛盾呢？囍雨得出嘅結論，就係郭家麒只係想做騷，而視國家憲法甚至《基本法》如無物！

根本就係一場政治騷

講到底，郭家麒參選港區人大代表，其實都只係一場「政治騷」，佢嘅目的好明顯就係想話畀人聽選港區人大係有預選、祝福等等，而佢參選就係想「彰顯」選舉唔公道，繼而為自己爭取曝光率。當佢高調話要參選，吸引咗唔少「眼球」嘅時候，有唔少傳媒嘅「鎂光燈」都對準佢；但係當場騷差唔多做完喇，佢自己就「露出馬腳」，用行動話畀人聽佢自己唔想擁護國家憲法、《基本法》甚至「一國兩制」，名符其實「有頭威、冇尾陣」！呢個亦都係囍雨非常唔鍾意盲反派嘅原因，成日做政治騷唔做正經嘢，好似做乜都係為咗上報咁，而郭家麒呢場「獨腳戲」，仲要係爛尾收場添！

囍雨有時真係唔係好明白，究竟公民黨而家喺度搞緊乜，明明本來係一個吸引中產、精英嘅政黨，但近年樣樣嘢都政治化，甚至為「出位」乜都做得出，後生嘅例如楊岳橋就話年青抗爭者「留案底令人生更精彩」，嘅郭榮鏗就為咗反對修改《議事規則》而講出「三倍奉還」嘅懷疑恐嚇言論，而家較年長嘅郭家麒為咗做騷就去「假參選」人大代表。其實公民黨咁樣搞搞下，同變咗激進派有咩分別？咁大家以後投票，要選出溫和嘅反對派，係咪已經唔駛再投票畀公民黨？呢啲問題真係值得深思！

原圖：RTHK