上個禮拜四立法會討論緊修改《議事規則》嘅時候，多名盲反派議員企圖霸佔會議廳，當保安人員執行主席命令嘅時候，民主黨許智峯上前阻止保安執行職務，更涉嫌用手拍打保安人員。立法會行管會向許智峯發警告信，指佢可能傷害他人同違反立法會權力及特權條例，許智峯竟然反指行管會「含血噴人」、「屈得就屈」。囍雨就覺得，許智峯根本就係轉移視線想逃避責任；如果佢真係咁無辜，不如話唔接受警告，叫立法會報警吧！

許智峯文不對題扮無辜

只要細閱行管會嘅決定或者立法會主席梁君彥嘅講話，會留意到行管會並唔係確實話許智峯傷人，而係話佢可能作出咗傷害他人嘅行為，而許智峰自己又確實拍打過保安人員，傷人嘅可能的確存在，行管會又點「含血噴人」呢？再者，對於行管會指許智峯可能有機會違反咗《立法會（權力及特權）條例》第19（b）條（下稱「P&P」），即妨礙正在執行職責嘅立法會人員，更幾乎係鐵一般事實，許智峯剩係聲稱自己無傷人，佢敢唔敢講話自己冇違反「P&P」先？

囍雨雖然唔係咩法律專家，亦都唔似許智峯咁讀法律畢業，不過上網翻查立法會（權力及特權）條例，其中第19（b）寫明「襲擊、干預、騷擾、抗拒或妨礙任何正在執行職責的立法會人員即屬犯罪，可處罰款$10,000及監禁12個月」，許智峯作為立法會議員，佢係唔知自己有呢條法例，定係唔知自己嘅行為可能已經犯咗法先？如果佢覺得係後者而又堅稱自己無辜，不如報警處理啦！

報警處理最實際

可能許智峯覺得自己「抗爭無罪」，但P&P嘅法例寫得清清楚楚，而許智峯嘅行為亦似乎干犯咗相關法例，如果許智峯真係咁唔忿氣，囍雨如果係許智峯就一定會表示唔接受警告，叫立法會行管會報警處理，等執法部門甚至法庭還自己清白，不過囍雨唔知許智峯有冇呢個勇氣呢？

老實講，盲反派要搞議會抗爭、要堅持「拉布」，囍雨都相當理解，因為如果立法會修改咗《議事規則》，以後佢哋要利用「拉布」綁架民生、騎劫議會將會相當困難；撇除盲反派係咪逆民意而行，許智峯自己涉嫌違法仲「反咬」立法會行管會「一口」，行為實在相當唔要得。「含血噴人」者，係許智峯先啱！

原圖：RTHK