立法會修改《議事規則》進入關鍵時刻，由於建制派提出嘅議案「督正」盲反派死穴，盲反派無計可施下用盡一切方法，誓要阻止修改《議事規則》。經過幾年內耗，市民唔再認同「拉布」呢種損人不利己嘅行為，偏偏盲反派仲以為「民意」站喺自己一邊，噚晚竟然發起「包圍」立法會，煽動支持者一齊到立法會外「紮營」抗議。最後？梗係失敗收場，其實支持修改《議事規則》嘅民意昭昭，盲反派係咪仲唔知醒，以為市民好支持佢哋呀？

欲「二次佔中」 市民唔領情？

大家係咪覺得「包圍」立法會呢招似曾相識呢？如果大家仲記得幾年前有關違法佔領嘅新聞，當年就係黃之鋒佢哋以罷課、集會為名，跟住到最後一日就煽動學生衝擊政總，引發之後嘅「違法佔領」。今次盲反派又搞「集會」、「包圍」立法會，係咪想搞「二次佔中」先？盲反派只會搞「純集會」，囍雨就真係唔係好信喇！

老老實實，市民根本就支持修改《議事規則》；根據中大嘅一個民意調查，較多數市民都係反對「拉布」、支持修改《議事規則》，盲反派要逆民意而行，又談何容易呢？再者，經過違法佔領一役，市民已經深深體會到盲反派「叫人衝，自己縮」嘅本色，如果到場支持盲反派又畀人煽動去衝、去犯法，係咪有啲戇居呢？

修改《議規》 不減監察權力

一個更加根本嘅問題，係囍雨覺得今次盲反派打出嘅旗幟，其實根本就無乜號召力，佢哋不斷聲稱如果今次畀建制派成功修改《議事規則》，23條以至《國歌法》等法例就會隨之而來；但點解講咁多次喺坊間都無乜反應呢？根本原因咪就係修改《議事規則》，根本同上述立法工作冇關，《議事規則》更加唔會影響議員監察權力囉！

大家試想想，就算成功修改《議事規則》，盲反派議員如常可以喺議會向官員提出質詢、就議案發言以及提出修正案；修改《議事規則》只係唔畀盲反派議員利用舊有規則不斷「拉布」、「點人數」或者大量提出「重複」嘅修訂等等嚟拖議會「後腳」。立法會唔係唔畀議員監察議會，而係唔畀個別議員拖垮議會；盲反派可以繼續逆民意而行，但佢哋嘅一言一行，市民看在眼裡、心中有數！

原圖：RTHK