出年三月就係立法會補選嘅日子，盲反派喺新界東同九龍西都有多於一個代表想出選，好似曾經做過幾年立法會議員嘅新民主同盟范國威咁吖，明明已經被選民「VOTE HIM OUT」，但仍死心不息喎，除咗喺網上動作多多外，日前仲已經正式報告參加補選，嚟緊會同工黨同自決派爭出線添。唔知係咪范國威過去幾年立法會工作乏善可陳，定係想搵機會突出自己「議會經驗」，總之佢日前喺造勢大會就不斷標榜自己曾經參與「拉布戰」，剩係呢一點，囍雨就覺得相當可笑！一個前立法會議員收咗五年公帑、做足五年，竟然無建樹到要將「拉布」當成績，明明就係政治凌駕民生、「拉布」綁架民生，仲好意思攞出嚟講，范國威你唔係呀化？

拉布當戰績 范國威「無料到」？

嗱，如果你問囍雨一個參選立法會議員嘅人應該具備咩條件，囍雨一定會答你，呢個參選人係為市民做實事，而唔係剩係識得搞事！可能盲反派對於立法會議員嘅要求有啲唔同，所以參加盲反派內部初選嘅范國威就以曾經「拉布」為榮，好自High咁話自己有份參與「三堆一爐」同「高鐵撥款」嘅「拉布」戰。其實，無論係「三堆一爐」抑或「高鐵撥款」都好，呢啲其實都係市民普遍歡迎嘅議案，范國威咁高調話畀人聽佢有份「拉布」，即係佢想話畀人聽佢有份阻礙民生議案，名符其實「政治凌駕民生」？

事實上，范國威咁高調話畀人聽自己曾經「拉布」，基本上佢所謂嘅「戰績」，都同港人福祉完全無關，甚至係損害到香港人嘅利益、斷送咗香港嘅發展；客觀效果就係，大家只會聯想到范國威事事以「政治為本」；好似佢之前同另一本土派議員毛孟靜「拖篋」反內地人咁，正正顯示佢哋除咗識得挑動矛盾，根本就唔識得喺議會為市民謀福祉、改善民生。

最叻挑動兩地矛盾

近日中大公布咗個民調，結果證實大部份市民唔贊成、唔支持「拉布」，足證「拉布」只係少數激進份子「自HIGH」嘅遊戲，范國威到今日仲想拎出嚟搶分，真係可恥又可笑。回想幾年前，范國威同毛孟靜喺2013年成立「香港本土」，聲稱推動本土議題，但所謂「本土議題」，其實就係「反內地」、挑動兩地矛盾；最經典一幕，就梗係佢哋帶頭喺尖沙咀「拖篋」反對內地遊客啦！雖然范國威等矢口否認自己係反對內地人嘅「始作俑者」，但呢啲只會「拉布」、「挑動矛盾」嘅政客，係咪適合做立法會議員呢？囍雨相信大家一定心中有數！

原圖：RTHK