立法會大會噚日開始討論修改《議事規則》，期間不斷出現叫囂甚至衝擊場面，而早曾發表涉嫌「恐嚇」言論，話唔排除會有保安「叉錯腳」嘅陳志全，果然連同其他盲反派「豬隊友」衝擊立法會保安、搗亂議會秩序，其中民主黨許智峯更疑似「出手」大力拍打保安嘅手。最過份嘅係，涉嫌出手傷人嘅許智峯，竟然惡人先告狀，質疑保安「濫權」喎。喺呢度，囍雨強烈譴責許智峯嘅暴力行為，亦要求立法會亦報警處理，因為根據法例，立法會保安喺會議廳內其實係有同警察一樣嘅權力架！

主動同保安糾纏 許智峯惡人先告狀

昨日發生暴力事件後，香港護衛及物業管理從業員總會晚上發表聲明，譴責許智峯喺立法會阻止保安員執行職務、大力拍打保安員嘅手；恬不知恥嘅許智峯，除咗否認自己所作所為之外，竟然「惡人先告狀」，話當時聽唔到立法會主席梁君彥有向保安員作出指令，質疑保安員是否「濫用權力」。老老實實，許智峯一言一行，除咗暴力同不文明外，其實仲係非常唔熟立法會相關法規。

根據《立法會（權力及特權）條例》第24條，每一名立法會人員喺會議廳範圍內，都具有警務人員嘅權力同享有警務人員嘅所有特權；換句話講，保安為咗維持會議廳秩序，根本就有權抬走班盲反派；許智峯話保安員濫權，好明顯係佢自己唔「熟書」！更何況，立法會主席梁君彥都表明，保安「抬」議員番埋位都係遵從佢指令，許智峯又係咪「老屈」保安呢？

陳志全暴力「成真」

當陳志全出晒口術話唔排除保安會「叉錯腳」後，囍雨已經隱隱有種感覺，班盲反友都係次次開會搞事架喇，不過修改《議事規則》一喺大會討論就即刻有暴力事件，囍雨都有啲始料不及。可以預見，喺未來一個月甚至更長時間，議會暴力都幾乎一定會出現，單單係將暴力議員逐出會議廳，相信都無助解決問題；所以，囍雨強烈建議立法會報警，將涉嫌使用暴力或者違反《立法會（權力及特權）條例》交畀警方處理，否則議會再無安寧之日。

喺市民眼前，修改《議事規則》嘅路雖然非常艱辛，囍雨希望支持議會重回正軌嘅代議士可以排除萬難、堅持到底；始終成功修改《議事規則》，議會秩序先有望重回正軌！

原圖：Wenweipo