立法會上演修改《議事規則》「大戰」，一如所料，盲反派用盡一切方法阻止建制派修改《議事規則》，點人數、不斷發言等等，「無所不用其極」；不過最過份嘅，其實唔係「拉布」、點人數，而係不斷作出恐嚇建制派，甚至係恐嚇市民嘅說話。好似人民力量陳志全呢位「拉布」王咁，佢話喎，自己希望同保安有肢體衝突架，但唔能夠保證出現保安「叉錯腳」等情況出現囉！嘩，好驚呀，照咁睇陳志全言下之意，即係連保安都恐嚇埋、話唔排除自己會使用暴力啦！說好的非暴力抗爭呢？呃人架？ 

不能接受恐嚇言論

陳志全講出呢番言論客觀效果，其實就係事先向立法會保安員「通報」，話畀大家知佢係一定會用暴力，班保安唔好阻住我呀，否則有乜受傷就閣下自理啦！其實面對呢啲疑似恐嚇言論，講真吖，立法會其實真係可以「執正」嚟做，唔知大家知唔知道，《立法會（權力及特權）條例》入面其實寫明，每名立法會人員喺會議廳範圍內，均具有警務人員所有權力同享有警務人員所有嘅特權！即係立法會一眾保安員其實可以執法、可以根據主席命令趕你班盲反派走，而你哋唔可以拒絕囉！

身為立法會議員，陳志全疑似恐嚇立法會保安，連明顯無視《立法會（權力及特權）條例》裡面嘅安排同規定，試問仲有咩資格去做議員？盲反派真係以為「民選」兩個字就大晒、可以凌駕香港法例？咪發夢啦。

盲反派三番四次出言恫嚇

事實上，盲反派近期已經唔係第一次為咗阻止《議事規則》修改而懷疑出言恐嚇，例如公民黨郭榮鏗同楊岳橋，都講過類似要建制派「三倍奉還」、「議會將唔能夠順利運作」等說話。不過，囍雨想講，盲反派呢啲言論唔單止對事情無幫助，而只會令市民更討厭佢哋，更加支持修改《議事規則》，最新由大學進行嘅民意調查，亦印證咗咗市民反「拉布」、支持修改《議事規則》的意願。

今次立法會討論修改《議事規則》，感覺好似一面「照妖鏡」咁，將盲反派醜陋一面統統照出嚟，盲反派當中嘅激進派，暗示會使用暴力、甚至令保安受傷不在話下，連佢哋嘅大律師都作出恫嚇建制派嘅說話；對於心清眼亮嘅市民而言，可以話係完全睇清楚晒佢哋嘅真面目！囍雨就覺得，要真真正正懲罰呢班政棍，最好嘅方法都係市民將佢哋嘅惡行記下來，喺下次選舉踢去佢哋。

原圖：RTHK