近年「政治檢控」呢個字非常Hit，有人衝擊違法好、有人破壞公物好、甚至有人唔依法宣誓都好，基本上全部被告都會畀盲反派人士以及佢哋嘅媒體話係「政治檢控」。囍雨噚日同今日睇新聞，見到澳門立法會議員因為涉及刑事罪行而被暫時中止職務，囍雨又見到《生果報》等媒體話係「政治檢控」，咁囍雨就有一個大疑問喇，係咪只要係所謂嘅「民主派」人士被檢控，就一定係「政治檢控」呢？

相關議員並非被DQ

驟眼睇，被暫時中止職務嘅澳門立法會議員好似被DQ咗咁，其實係法庭需要得到立法會許可，中止咗相關議員職務先可以令佢出庭應訊，如果有關議員最後係清白嘅，理論上係會恢復職務嘅；一個涉嫌違法嘅議員，根據澳門有關安排，停一停佢職務，等佢可以上庭受審，請問有咩問題？套用香港好多公私營機構嘅做法，如果有職員涉及刑事案件都會暫停佢職務先，咁根本唔係咩DQ喎，關咩事先？而法庭經正常程序處理案件，更加唔係咩「政治檢控」！

講返香港，囍雨真係好唔鍾意個別媒體以至盲反派政客係唔係都用「政治檢控」嚟形容發生喺港澳嘅案件，而呢啲案件嘅關鍵只有一個，就係盲反派班人到底有冇做過涉嫌違法或裁定已違法嘅事先？示威集會你可以話合法，但暴力衝擊又點合法呢？宣誓要依據誓詞格式基本上係常識，咁唔跟誓詞宣誓又點會係畀人「無理」取消議席呢？尤有甚者，有啲盲反派被告連唔依從法庭禁制令都可以話自己無罪，咁一般人又點畀反應呢班政棍呢？

勿以言論自由作擋箭牌

無論係盲反派抑或其他人士，佢哋絕對享有言論、表達自由，但咁唔代表佢哋可以為所欲為呀嘛！而且當佢哋話自己「公民抗命」嘅時候，佢哋應該好清楚知道「公民抗命」嘅後果，就係要承擔罪責；如果「抗命」完唔「找數」仲要老屈檢控部門「政治檢控」，咁以後個個都話自己係「民主派」然後又衝又掟嘢，咁法治會唔會蕩然無存呢？遊行、集會、衝擊、暴力、被捕、被告、聲稱被「政治檢控」，基本上已經成為盲反派同佢哋媒體嘅「公式」，但To be fair，係咪你哋違法在先，罪有應得呢？

原圖：RTHK