修改《議事規則》的大戰即將喺立法會大會上演，盲反派雖然想用盡一切方法阻止修改《議事規則》，但向來斯文、捱打嘅建制派議員終於都唔再「就住就住」，繼早前有議員提出大會要先討論修改《議事規則》的議案後，昨日又有建制派議員提出中止待續議案，務求大會盡快處理相關議案。唔止盲反派係咪已經無計可施，公民黨楊岳橋就開始「胡言亂語」，話修改《議事規則》會令議會唔能夠順利運作；正常嚟講，唔修改《議事規則》先會令議會無法運作，楊岳橋將啲嘢倒轉嚟講，佢思路係咪有問題呢？

「拉布」幾乎令議會癱瘓

楊岳橋嘅講法真係令人摸不著頭腦，只要大家睇番近幾年立法會發生咩事，就會知道再唔修改《議事規則》，議會就真係唔能夠再運作喇。舉個例，上個立法會年度盲反派點咗90幾次人數，耗時約16小時，而政府提交29項法案，都只能係通過咗12項；批出工程項目更加係慘不忍睹，明明工務小組已經通過咗成1,300億工程，但之後財委會只係批出咗唔夠600億工程。一個無容置疑嘅事實，就係再唔修改《議事規則》，立法會只會陷入無止境嘅混亂，效率亦會大打折扣。

楊岳橋思路混亂？

而楊岳橋作為大律師，理論上對於說話嘅內容、邏輯好嚴謹先啱，點解佢會講得出諸如修改《議事規則》會令議會唔能夠順利運作嘅說話呢？如果成功修改《議事規則》，佢哋點人數、搞流會等手段都唔會好似以前咁有效，唔係應該令到議會運作更順暢先啱咩？如果修改咗《議事規則》但立法會更加「唔能夠順利運作」，囍雨唯一諗到嘅可能原因就係盲反派到時「有理冇理」都玩衝擊、衝主席台甚至搶文件，斷估盲反派唔會喺日日喺立法會「開拖」呀？

其實楊岳橋都唔係第一次講埋啲謬論，之前因為「反新界東北衝擊立法會案」十三名被告被判入獄，楊岳橋竟然講得出「案底令人生變得更精彩」嘅說話，都唔知佢係讚緊十三名被告勇敢，定係笑緊佢哋係傻仔做政治「爛頭卒」；如果留案底真係咁「精彩」，點解楊岳橋又唔「精彩」一下呢？

其實，盲反派反對修改《議事規則》係意料中事，但楊岳橋作為大律師，講啲啲可唔可以Make Sense啲，水平高啲得唔得呢？

原圖：RTHK