黃之鋒鍾意去外國「唱衰」香港，相信大家都聽得多喇，囍雨近日睇到單新聞都幾得意，話說新加坡有一個社運人士因為未經許可多次主辦公眾集會而被起訴，其中一次涉及邀請黃之鋒通過網絡做演講。據報果次黃之鋒嘅演講題目係「公民抗命及社會運動」；查實任何有關於國家完整以至社會安定嘅議題，任何國家都會好緊張，所以有國家唔歡迎有外國人講「公民抗命」，仲要係唔事前申請果隻，其實都非常合理。

黃之鋒哪有法治觀？

對於有社運人士「因為」直播黃之鋒演講被捕，黃之鋒聲稱新加坡政府「畀中國大陸離譜」，話有人要喺各國封殺喺香港「爭取民主」嘅代表人物。其實果位社運人士被捕，據報應該係因為「舉辦未獲警方許可的公眾集會」、無幫黃之鋒演講申請工作證，即係無論請邊個演講、搞幾多次演講，都應該要申請先，等於喺香港集會都要申請一樣。如果有人唔依法申請集會或工作證，黃之鋒就將佢說成自己被「封殺」，好似太有「自信」喇喎！

從黃之鋒嘅回[應，囍雨仲睇到黃之鋒呢個人其實真係無乜法治觀念，如果佢嘅新加坡朋友乜都冇做而被拉，咁佢發聲都或者情有可原，但佢果位朋友搞集會唔申請、又冇依法同黃之鋒辦工作證，咁當地執法部門做嘢又有咩問題呢？仲有喎，黃之鋒同新加坡國民講嘅，唔係純粹嘅政治意見分享，而係好可能帶有煽動「公民抗命」成份嘅演講，而家仲要係唔申請，畀著囍雨係新加坡執法部門，都一定會做嘢啦！

到處散播「違法達義」

黃之鋒經常演講，美其名係「公民抗命」，實質就係搞事、違法仲要唔找數嘅「違法達義」宣傳，大家可以諗下，如果佢去英美係教英美居民要「違法達義」，企出嚟反對政府或者資本主義霸權，相信英美都未必會歡迎黃之鋒；同理，新加坡喺判斷畀唔畀黃之鋒演講前要先申請、評估，又有乜問題呢？

其實，世界上任何國家相信都唔會歡迎有人教佢哋國民違法抗命，黃之鋒話自己被打壓或者封殺之前，不如都諗下件事本身有冇依法跟程序辦事，同埋諗下佢教人哋國民做咩先啦！

原圖：RTHK