英國前自由民主黨黨魁阿什當男爵（Lord Ashdown）日前訪港，期間接受媒體專訪，喺講到「雙學三人」黃之鋒、羅冠聰以及周永康嘅時候，話佢自己雖然唔同意「三人」所做嘅全部事情，但認為佢哋為捍衛「一國兩制」發聲，「欣賞『三人』咁樣做」，又話其他香港或者都係時候為「一國兩制」發聲。囍雨覺得阿什當欣賞「雙學三人」當然冇問題，但發聲唔等同於可以違法，發聲更加唔代表要傷害到其他人，呢啲概念真係唔好混淆。

要發聲 更要法治

由於囍雨唔係第一身喺現場聽阿什當接受訪問，只能根據傳媒報道估計佢一番說話嘅意思，囍雨估阿什當大約意思可能係話雖然唔太欣賞「三人」行為包括違法衝擊，但就欣賞佢哋勇於發聲。囍雨就覺得，就算真係要「發聲」，都唔代表要做法違法衝擊甚至有暴力成份嘅行為；如果有「理由」而違法可以受到欣賞，咁香港仲邊有唔亂落去嘅理由呢？

近年發生咁多違法衝擊、堵路甚至暴動案件，唔少盲反派支持者都會提出一種論述，話「佢哋咁做都係為咗社會啫」，但囍雨想講呢種講法真係極度危險；如果今日A君因為要爭取「全民退保」而衝擊傷人，聽日B君因為要爭取「普選」所以作出違法行為，後日C君又話要反《國歌法》所以犯法，咁仲成世界嘅？大家可以思考一下。

勿以藉口掩蓋罪行

囍雨覺得阿什當呢個「欣賞論」係相當危險嘅，因為如果唔同嘅人都因為不同「理由」而犯法，咁法治社會就一定受到好大衝擊。仲有，佢呼籲市民為「一國兩制」發聲或者發表意見當然冇問題，但如果佢先話欣賞「雙學三人」，繼而叫其他香港人都「發聲」，好容易令人誤會佢都會繼續「欣賞」其他好似「雙學三人」咁嘅抗爭者。囍雨唔敢用陰謀論睇阿什當，但只想問一句，如果呢啲情況發生喺港英殖民時代，唔知港英政府會點處理呢？有冇香港警察處理得咁和平呢？

其實，當外國唔同人士不斷為「雙學三人」發聲嘅時候，囍雨真係好懷疑佢哋到底有冇畀人誤導，例如知唔知案件有暴力成份、有人受傷；如果唔知，咁佢哋就可能畀香港一啲政客或者媒體利用咗都唔知喇！

原圖：Wenweipo