近年不斷出現違法衝擊甚至暴動案件，雖然唔少人犯罪嘅罪狀確鑿，但盲反派班人硬係要將犯法嘅人英雄化，仲要諉過於執法者；囍雨近日喺網上面睇到一篇由港大前學生會會長馮敬恩寫嘅文章，佢今次就唔係寫曾經犯罪嘅自己喇，而係借摩西、港大宿生嘅故事，讚揚旺角暴力主要被告梁天琦係英雄，仲話唔希望再有好似梁天琦咁「年輕有為」嘅年輕人成為社會製造出嚟嘅英雄同受害者。喂喂喂，梁天琦策動旺角暴動，搞到咁多警察受傷，囍雨想問佢「英」喺邊，同埋「雄」喺邊呢？

不是英雄 是疑犯

囍雨又要喺度再強調，梁天琦、黃台仰以至其他涉嫌違法嘅盲反派人士，佢哋都唔係咩英雄，而係涉嫌犯罪嘅疑犯。可能有人會唔同意囍雨咁講，覺得佢哋好「英」，但大家諗下，係咪有崇高理想就可以犯法呢？而且仲要係煽動他人嘅暴力行為喎！以旺角暴動案為例，就算班暴徒有政治訴求，但點解要襲擊警察呢？傷害到警察同社會都係英雄？囍雨就點都唔贊同喇！

對於盲反派呢種「英雄論」，如果大家睇真啲件事，就係將自己嘅政治訴求建築喺他人嘅痛苦身上，佢哋嘅論述根本就係唔合理！無論佢哋嘅目的有幾「崇高」都好，都唔能夠證明到佢哋傷害無辜係啱嘅。可能因為馮敬恩同梁天琦都係「港大」人，所以特別欣賞梁天琦，但馮敬恩你自己衝擊校委罪成求情嘅時候，都唔係講過更激進行為無助解決問題、後悔自己對大學造成損害咩？乜而家又英雄化梁天琦咁有趣？

梁天琦「目的」也有問題？

再者，如果馮敬恩要用聖經人物比喻梁天琦嘅處境，或者表現梁天琦即使市民冷淡都願意走出嚟，但馮敬恩有冇留意到梁天琦背棄咗佢嘅支持者呢？旺角暴動案幾十人被捕，有啲仲已經畀法庭被判入獄。但叫佢哋衝出嚟嘅梁天琦呢，接受傳媒訪問果陣話明「我懦弱囉」、「唔想依家要即時還押」，縮得就縮，講到梁天琦咁高情操，好似唔係好符合實情呢。

其實，唔好話有良好目的都唔可以證明暴力手段係啱嘅，囍雨本身都好懷疑梁天琦等人嘅「目的」係咪有道理？如果香港真係要走「港獨」路，恐怕前路更坎坷！

原圖：港人講地