香港人，除左搵食，講得最多既係咩？係核心價值！核心價值，包括自由、民主、人權同法治等等。上個禮拜立法會審議新界東北發展計劃前期撥款，有反對撥款既示威者衝擊立法會，唔單止令立法會大樓部分受損，連帶保安、警察都有受傷。昨日泰國、台灣既暴力衝擊已經來臨香港，堅持核心價值既香港人，仲要扮睇唔到？

其實反對新界東北發展，本身係無問題，示威者都有反對既自由，但係用抹黑既方式唱衰計劃，廣男對呢種自由真係有保留！明明新界東北可以發展既300幾公頃地有40公頃係用嚟起公屋、居屋，變成得6%發展用地係起資助房屋；明明政府得幾百頃閒置既建屋用地，又變成4000公頃。係唔係懶人包唔緊要，但懶還懶，唔好抹黑先得架，如果有理據，又使乜出呢啲陰招？

再退一步，就算得到既資訊真係有錯，將解決房屋供應短缺既計劃，變成割地賣港既計劃都好，咁就代表可以犯法？情況就好似因為某人認為A做錯事，所以出手毆打A；又或者某學生唔喜歡老師某個決定，所以要撞爛教室門，迫老師讓步。如果呢個邏輯係通，或者係合理既，咁法治呢個核心價值，只會變做漂亮既口號！

當好多人見到泰國既亂局，或者台灣佔領立法院既情況，都好擔心今日泰國，會變成明日香港，或者今日台灣，變成明日香港。而家某啲人夢想成真，香港真係變成泰國、台灣，社會勢必捲入無限內鬥、無盡衝擊既境地，對別有用心既人嚟講，呢個係撈政治油水既好機會。但對香港人嚟講呢？呢個係令香港萬劫不復既困境。

唔好話廣男話，呢班後生仔一定係受咗之前台灣既「佔立」事件影響同感染，認為只有「佔領」先可以解決問題，其實真係唔係咁囉。點都好啦，發展到今日既境地，其他市民一定唔好怕、要出聲先得，否則香港只會愈來愈大鑊，唔想香港變成暴力都市，唔該唔好再啞忍喇，出句聲鬧醒呢班示威者啦！

原圖：women2