自從立法會十月復會之後，基本上大家聽得最多嘅就係「拉布」、「拉布」同埋「拉布」（重要嘅講三次），盲反派聲稱佢哋因為要阻止《議事規則》修改同反「一地兩檢」所以要「拉布」，講到自己完全企喺市民果邊咁。不過，唔知係佢哋其他方面有問題，定係因為「拉布」拉到神憎鬼厭，盲反派幾個議員嘅民望都暴跌，其中朱凱廸更加係跌幅最犀利嘅。囍雨就覺得，如果盲反派繼續咁玩落去，下次選舉分分鐘要「票債票償」都唔出奇！

十大議員盲反派只佔四人

港大民研喺今個月八日至十六日進行議員嘅熟悉程度同埋評分調查，盲反派只有四個議員能夠保住「十大議員」之列，包括民主黨涂謹申、公民黨陳淑莊、自決派朱凱迪以及本土派毛孟靜；當中以朱凱廸嘅評分跌幅最大，排名下跌四位到排第七，涂謹申排名跌兩級排第三位，陳淑莊排名亦跌兩級排第六位，而毛孟靜排名則跌三位至排第八位。簡單嚟講，即係就算保得住入到「十大議員」，幾個盲反派嘅評分同排名都全告下跌。

呢個民調嘅調查時間喺朱凱迪引用《議事規則》第88條「要求新聞界及公眾人士離場」動議、變相「拉布」之後大約一至兩星期，朱凱迪係咪因為侵害新聞自由而失去部分市民支持大家可以自己衡量；但係當幾個「十大」嘅盲反派議員評分、排名都一齊下跌，囍雨就覺得唔係因為一啲個別事件令到某一、兩個議員評分下跌咁簡單，而係一班盲反派議員嘅行為好可能已經引起部分市民反感。

拉布問題 前所未有

睇番今日嘅議會生態，可以話「拉布」已經成為常態，盲反派唔理民意自己堅持反對「一地兩檢」，就喺政府嘅無約束力議案上瘋狂「拉布」，朱凱迪甚至為咗「拉布」無所不用其極，一時引用20年無用、通常喺緊急情況之下先用嘅《議事規則》動議有關銀行業嘅議案唔駛交去內委會審議，一時甚至連新聞界都唔能夠幸免畀朱凱迪動議離場；直到今日，盲反派為咗阻止有效改善議會運作嘅《議事規則》，又不斷「點人數」導致流會。一句到尾，只要佢哋唔鍾意，議會就唔駛運作咁濟！

今次有民調指出盲反派議員評分下跌，如果班盲反派能夠體察到當中因由，就好應該收收手，如果繼續「拉布」拉到更多市民對佢哋神憎鬼厭，就後悔莫及喇！

原圖：港人講地