民主黨立法會議員林卓廷「因利乘便」，上個禮拜代表立法會去英國開會嘅時候四出「唱衰」香港，噚日仲同英國國會議員會面，繼續貫徹佢「盲反」風格，一時又講人大釋法，一時又講新聞同學術自由，甚至連由佢一手「吹出嚟」嘅廉政風暴都攞出嚟講。政治抽水多於一切！

仲好意思講廉署風波？

其實林卓廷用公費去英國做「自己嘢」，已經引起唔少批評架喇，但囍雨覺得佢更過份嘅地方，係佢經過林子健嘅「釘書健」事件後依然死不悔改，繼續幻想當事實，攻訐港府。點解咁講？以佢成日掛喺口邊嘅廉政公署李寶蘭署任事後為例，佢講到李寶蘭因為政治原因冇得升職咁，但又攞唔出實質證據，搞到連廉政專員都要走出嚟澄清；林卓廷喺無證據之下又要詆譭人，都已經唔係第一次架喇，佢而家仲去同英國議員講佢呢啲「故仔」，會唔會厚顏咗少少呢？

只要諗真啲林卓廷所講嘅嘢，都會覺得佢講嘅嘢好唔合理。第一，廉署入面嘅嘢好多係保密嘅，林卓廷厲害到連廉署內部嘢都知？第二，就算林卓廷真係因為做過廉署而收到風，一個只係喺廉署做左三年嘅初級職員，又會知道啲咁高層次嘅秘密？更重要嘅係，佢喺攞唔出證據嘅情況下炒作廉署內部事件，會唔會係佢先係破壞廉署名聲嘅元凶呢？

林卓廷有看過中英聯合聲明嗎？

此外，林卓廷聲稱中央政府違反2017普選特首嘅承諾，係無落實《中英聯合聲明》嘅承諾；囍雨唔知林卓廷有冇真係睇過《中英聯合聲明》，入面好似係寫「行政長官在當地通過選舉或協商產生，由中央人民政府任命」，睇真啲係無寫普選嘅，而且中央批准特區政府推出普選方案，只係你哋班盲反派要否決方案喎！

如果林卓廷話呢個係「假普選」方案，所以唔能夠接受，但係當年「無普選」、「只有超級區議會」等議席嘅政改方案，民主黨唔係有份支持嘅咩？當年一個無普選行政官嘅方案佢哋願意接受，之後真係畀500萬市民一人一票選特首嘅方案佢哋就唔接受，仲要攞出嚟講？講到呢度，囍雨真係好想講唔該民主黨等盲反派，還番一人一票畀我哋！

原圖：wenweipo