「雙學三人」包括黃之鋒因為衝擊政總畀上訴庭判監，三人就案件上訴到終審法院，由被檢控、入罪到上訴庭覆核甚至到呢一刻為止，盲反派依然堅稱案件係政治檢控，連權威法律人士嘅評論都唔放在眼內。

近日，終審法院前常任法官列顯倫出席講座嘅時候話判決基於法律原則，案件涉及暴力又有人受傷，罪行唔會因減刑考量而改變，仲強調本港司法獨立冇受威脅。連列顯倫都力撐案件冇問題，但黃之鋒仲話覆核案件如果係「零政治考慮」係匪夷所思。其實，等待上訴嘅黃之鋒話晒都係被告之一，佢講咁多嘢唔怕畀人話佢出口術、有利益衝突？

黃之鋒作為被告應避嫌

有關於「雙學三人」案嘅問題，囍雨真係好懷疑黃之鋒係咪可以同其他人一樣係咁評論案件，因為正「等待上訴」嘅黃之鋒嚴格嚟講仲係保釋緊嘅被告，如果佢不斷評論案件，怕唔怕有利益衝突呢？黃之鋒本身嘅性格可能慣咗「包拗頸」啦，但佢不斷講類似政治檢控嘅說法，佢唔怕有人話佢因為想脫罪或者唔駛坐監而出口術咩？

當黃之鋒仲係有意冇意話畀律政司司長政治檢控甚至打壓嘅時候，我哋首先要問一句，律政司長長好或律政司又好，喺「雙學三人」案件裡面，有冇做過唔符合法律規定嘅程序先？例如告「雙學三人」嘅時候證據充唔充份，或者提出刑期覆核嘅時候又有冇根據等等，其實律政司喺其他唔同案件都試過提出刑期覆核，唔通今次對象係黃之鋒佢哋，所以就係政治檢控？咁樣講唔係好通喎！

確實違法 何來打壓？

事實上，當黃之鋒等人不斷出口術嘅時候，我哋係咪應該問下，黃之鋒等人本身有冇犯法先？囍雨相信連黃之鋒甚至佢嘅代表律師都唔會反對嘅就係，黃之鋒等人就如原審時所判，佢哋的確係有犯法、有罪嘅，而家佢哋基本上都係想用法律觀點打上終審法院打到唔駛坐監啫。一班自己犯咗法嘅人，話畀人政治檢控，唔係好可笑咩？喺終審法院未審結案件前，黃之鋒會唔會因為被判監超過三個月而五年內喪失參選資格都未知，但囍雨喺度奉勸黃之鋒作為被告，都應該收下把口，如果唔係轉頭畀人話佢想干預法庭都唔係幾好啦！

原圖：大公報