噚日香港足球隊喺主場迎戰黎巴嫩，又再發生所謂球迷「噓國歌」事件，唔知道港隊會唔會因此而被亞洲足協重罰；根據傳媒報道，噚日都有唔少惹火人士入場「玩埋一份」，包括中大學生會前會長周竪峰以及有「女長毛」之稱嘅雷玉蓮等，其中雷玉蓮等表明自己係入場「噓國歌」。事實擺在眼前，嗰啲「噓國歌」嘅人，根本就唔係球迷，而只係趁機鬧事者；如果佢哋咁做係為咗反《國歌法》，咁佢哋嘅行為就更加愚蠢，因為佢哋咁做更加顯示《國歌法》應該立法，以絕侮辱行為！

噓國歌適得其反

其實果班所謂球迷入場「噓國歌」，唔多唔少都係為咗反《國歌法》，但廣男就覺得佢哋咁做真係好蠢，因為當公眾見到佢哋行為咁猖獗，咪更加認為應該就《國歌法》立法。如果佢哋覺得唔需要、唔應該就《國歌法》立法，就應該自律一啲，以免更加遭人口實。情況就好似盲反派反對修改《議事規則》咁，做下樣都會喺立法會減少「拉布」，話畀人知唔一定要修改《議事規則》一樣。不過，廣男睇班所謂球迷或者滋事者，就完全無呢個智慧喇！

可能班「噓國歌」嘅人覺得自己行為「好有型」，但佢哋咁做令人更支持《國歌法》立法之餘，仲有一個極度唔好嘅客觀效果，就係佢哋聲稱會支持嘅香港足球隊可能會受罰。其實之前接二連三喺球場發生「噓國歌」事件，港足畀人警方又試過、罰款又試過，據報如果情況持續落去，下次仲有可能被罰閉門作賽等等。如果為咗作出政治宣示，而令到代表香港嘅足球隊被罰，咁樣班滋事者有咩益處呢？

基本尊重也欠缺

更重要嘅係，班滋事者一而再、再而三「噓國歌」，係顯得佢哋連他人以至國家象徵嘅基本尊重都無；呢班人係咪支持國家、香港，廣男當然控制唔到啦，但佢哋唔鍾意某啲嘢，同係咪要表達出唔尊重甚至作出冒犯行為，係兩回事嚟架喎！事實上，佢哋唔滿意《國歌法》甚至政府也好，要表達意見有好多方法，選擇喺球場作出冒犯行為，咁樣唔只代表佢哋反對某啲嘢，而係顯示佢哋連基本尊重都欠缺。一言以蔽之，廣男就覺得呢班人可能覺得自己「好型」，實則累人又累街坊，仲係喺公眾面前表現出自己唔尊重果隻！

原圖：港人講地