出咗名鍾意抽政治油水嘅民主黨立法會議員林卓廷，最近去咗英國，話自己「因利乘便」順道「舉報」前特首梁振英「涉貪」同「逃稅」。不過講嚟講去，其實都係無證據喺手，講到尾其都係「抽水」。本來政客抽水，都係常識嚟架喇，但林卓廷好似越抽越起勁，竟然去埋英國外交部，叫人哋關注議員DQ案同青年犯被檢控嘅事；喂喂喂，林卓廷講到一干人等畀人政治打壓咁，佢有冇同人講到明，啲被DQ嘅前議員同青年犯，本身係違法「宣獨辱華」在先，同埋使用暴力，搞到啲保安員傷晒先？之後仲「走數」拒絕認罪，完全談不上公民抗命囉！

林卓廷有道出DQ案等事實嗎？

根據林卓廷喺Facebook嘅發帖，囍雨唔知道佢去見英國外交部代表果時，提及到立法會議員被DQ、社運同青年領袖被檢控等等，實際上有冇全盤客觀咁去講；囍雨只係想問，林卓廷喺表達「憂慮」嘅時候，到底佢係話被DQ議員本身違反咗《基本法》、《宣誓及聲明條例》，所以被政府入稟要求撤銷議員資格，定係講啲唔講啲，剩係話政府政治打壓、DQ議員呢？

同理，林卓廷喺反映社運同青年領袖被檢控一事嘅時候，唔理佢係講緊「反新界東北衝擊立法會案」抑或「雙學三人衝擊政總案」，佢又係點演繹先？到底佢係話呢班年青人本身有衝擊行為被捕、被告，定係「純綷」話佢哋示威、表達訴求被捕、被告先？林卓廷會唔會為咗引起外國關注而以偏概全，囍雨覺得林卓廷好應該交待清楚喎！

因利乘便 唱衰香港？

老實講，其實囍雨對林卓廷嘅印象一向麻麻，事關佢成日為抽水而不惜亂講一通，好似果時廉署李寶蘭署任事件，佢就講到李寶蘭係因為政治所以升唔到職咁，搞到連廉政專員都要出嚟澄清。仲有，近月民主黨發生轟動一時嘅「釘書健」事件，林卓廷就陪同疑似作故仔、正被起訴嘅林子健一齊出嚟開記者會。講真，佢去英國開會「順便」唱衰香港，以佢性格嚟講梗係一啲都唔出奇啦；不過，囍雨質疑佢所講嘅係咪事實先？

其實，林卓廷就係想喺外國面前營造一種香港「一國兩制」有問題，甚至係民主、法治受損嘅感覺出嚟，不過講還講，林卓廷有冇老屈港府，同偏幫違法者先？

原圖：林卓廷Facebook截圖