噚晚喺旺角大球場，香港足球隊喺主場迎戰巴林，播國歌嘅時候又出現所謂「球迷」噓國歌事件，甚至有人在場做出不文手勢。眼見情況越來越嚴重，明眼人都會覺得應該盡快進行《國歌法》本地立法，以刑罰減少侮辱國歌嘅行為啦；偏偏公民黨嘅立法會法律界議員郭榮鏗就憂慮點樣執法，大約意思係話再有大型球賽，如果要執法會唔會引起重大警民衝突呢？囍雨真係想問，如果多人犯法就執唔到法，咁咪好多法例都唔駛立法、執行？

郭榮鏗應問個對錯

首先，囍雨對於郭榮鏗話唔認同噓國歌行為，都係感到欣慰嘅，但佢話擔心執唔到法嘅說法，囍雨就覺得唔係好啱喇！囍雨理解到嘅意思，郭榮鏗係話如果咁多人一齊涉嫌違法，警方要執法咪好容易有衝突，政府係咪要三思而行呢？郭榮鏗嘅問題，如果係叫政府考慮「如何」執法，咁當然無問題啦；如郭榮鏗係想叫政府難執法就唔好執法喇，咁問題就大喇！舉個例，如果有一批人喺度打鬥，會唔會警方又因為人太多，執法有困難，所以就此作罷呢？

答案梗係唔會啦！政府立唔立法、警方執唔執法，基本上係建基於一個重要概念，就係件事本身啱唔啱，例如涉及暴力嘅，就算幾難執法都要做！同理如果國家以至本港已經立法以防有人侮辱自己國家代表歌曲，就算多人同時涉嫌違法，再困難警方都要基於法律、道德執法。郭榮鏗作為大律師、立法會議員，唔通佢唔明白呢啲道理？

國歌法立法或困難重重

其實正如前警隊「一哥」李明逵所言，執法，從來都係困難，根本就冇簡單過。如果因為執法困難就唔去執法，咁仲成世界？香港豈不是烏煙瘴氣？況且如果執法簡單，又何需政府每年投入大量資源畀香港警隊？有分析估計，《國歌法》立法大約需時半年至九個月，不過囍雨認為，《國歌法》立法時間應該要更長；當中原因好簡單，因為到時一定有好多口講要尊重國歌、實則對《國歌法》立法提出好多質疑嘅盲反派議員出手拖延，甚至會「拉布」、點人數，搞到立法會亂糟糟！

其實，只要心清眼亮嘅市民諗下香港嘅法制以及司法系統，都會知道法庭判案既睇行為又會睇動機，法官又點會亂判無心犯《國歌法》嘅人有罪呢？好似立法會議員林卓廷咁講到犯《國歌法》可能會畀人「無限期偵訊」、「拷問」咁，諗真啲，都係盲反派講出嚟嚇人嘅啫！呢個策略同佢哋反對喺西九高鐵站進行「一地兩檢」一樣，總知就係要先嚇怕市民，唔係邊度有人同佢哋一齊反政府呢？

原圖：港人講地