《國歌法》將會進行本地立法，盲反派傾盡全力反《國歌法》，基本上係必然嘅事嚟架喇；好似民主黨立法會議員林卓廷咁，呢個從來就「林子健釘書機」事件道歉嘅「扮廉政專家」，今日喺報章出咗篇文叫〈國歌法狂想曲〉，內文話就算係坐輪椅嘅人都要買張「直立式輪椅」，又話普通話唔純正都可被判有期徒刑三年。呢啲擺明亂作同吹水嘅例子，寫出嚟完全係「靠嚇」，林卓廷呢個盲反派，到底仲有咩資格自稱代議士先？

以狂想為名 生安白造為實

綜觀林卓廷整篇文嘅內容，客觀效果就係要透過誇張失實嘅例子，令到盲反派支持者對《國歌法》望而生畏，呢種手法唔單止卑劣，甚至可能有歧視成份添。

首先，林卓廷話如果被懷疑侮辱國歌，除咗會被軟禁、拷問，仲可能會被「無限期偵訊」，然後就話坐輪椅嘅人都要買張「直立式輪椅」；跟住又講到如果普通話唱國歌唱得唔夠純正，都可以被判有期徒刑三年。更過份嘅係，林卓廷話任何人五音不全都唔可以唱國歌，因為《國歌法》屬全國性法律，凌駕《殘疾歧視條例》。除此以外，林卓廷仲話少數族裔要通過國歌能力測試方能入學，總知就係要講到《國歌法》好鬼恐怖咁囉！

歧視殘疾、五音不全及少數族裔？

林卓廷所講嘅嘢當然唔符合實情，《國歌法》的確係全國性法律，但就冇可能會凌駕香港其他法例，全香港唯一有凌駕性地位嘅法例就係《基本法》，就連《國歌法》條文都唔可以同《基本法》牴觸架！反而林卓廷嘅言論，似乎更有可能構成歧視，例如佢話坐輪椅嘅人要「直立」，係咪有歧視殘疾人士嘅成份呢？又例如佢話要少數族裔要通過國歌能力先可以入學，又係咪歧視少數族裔呢？林卓廷真係唔好以為佢喺篇文加咗「狂想曲」三個字就免責，如果有殘疾人士或者少數族裔見到佢講啲咁過份嘅說話而投訴佢，我諗佢就無咁輕挑啦！

更重要嘅係，林卓廷身為立法會議員，一言一行都應該非常謹慎，除咗唔好講涉嫌歧視嘅說話之餘，都應該睇下《國歌法》立法立成點先再作判斷。廣男非常懷疑，林卓廷雖然經歷過林子健嘅「釘書健」事件後，仍然未汲取教訓，要繼續胡作非為！

原圖：stheadline