選舉事務處安排明年三月補選四個出缺的立法會議席，建制派早已經密鑼緊鼓備戰，盲反派亦開始部署派咩人出嚟參選；本來盲反派諗住先搞場所謂「初選」，去決定由邊個出戰九龍西、新界東等議席，不過喺呢個時候，民主黨副主席羅健熙就提出與其搞「初選」，不如搞「棄選」，即係如果有人想選就即管參選，到投票日前大約一星期，就按照民調結果決定邊個應該繼續工程、邊個應該暫停工程，等民調最高嘅人同建制派決一高下咁話。呢個「棄選」嘅劇本，係咪似曾相識，咁樣對建制派或者其他候選人，又係咪公平呢？當然唔係啦！

民主黨想翻炒鄺俊宇劇本？

如果大家仲記得上年立法會選舉嘅「超級區議會」議席，大家都會記得開頭盲反派有幾個人參選，到咗選舉嘅尾聲，當時民協何啟明、公民黨陳琬琛同新民主同盟關永業都先後宣布「棄選」，當中關永業話新民主同盟「頂唔住不斷受到嘅壓力」，為咗唔駛其他參選黨友受攻擊，佢決定停止選舉工程，仲話呢個係「從政以來最黑暗嘅一天」。結果係點，咪係民主黨鄺俊宇、涂謹申宇雙雙當選，其中受惠於「棄保」效應嘅鄺俊宇仲攞成49萬票，一躍成為票王。今次民主黨建議用「棄選」代替「初選」，仲唔係「食髓知味」？

或製造不公平選舉

囍雨唔肯定民主黨提出「棄選」係咪想翻炒上年選舉鄺俊宇個劇本，囍雨唯一肯定，呢個「棄選」方案其實極唔公平。首先，各個候選人正式企出嚟參選，其實係對選民作出一個服務社會嘅承諾，一見支持度低就隨時話唔玩，起碼會令支持者失望；第二，如果一早講明會有「棄選」，咁當初派咁多人出嚟，即係想分薄建制派候選人同選民接觸嘅時間。大家唔好唔記得，香港法例規定，所有電子媒體安排候選人上選舉節目，都要分配相同時間，N個打一個，即係明玩嘢啦！第三，幾個盲反派候選人出嚟選，齊齊夾擊建制派候選人，合力「打殘」建制派候選人，到咁上下時候就「棄選」剩一個，然後透過媒體力谷果個候選人，用數倍資源最後變成力谷一個候選人，囍雨就覺得唔好妥當喇！

其實想確保公平選舉，最好嘅方法就係不論任何光譜，有志服務社會想參選嘅都可以出嚟參選，力戰到最後一刻而唔好一見民調唔對路就「棄選」；如果以後選舉都好似盲反派喺上年超級區議會玩「棄選」咁，咁以後會唔會經常出現「六個打三個」甚至「七個打兩個」嘅不公平情況呢？希望盲反派唔好當選舉係電子遊戲，可以隨時按個「Quit」掣就唔玩啦！

原圖：RTHK