香港專上學生聯會（下稱「學聯」）宣布成立「抗爭者支援基金」，話要支援被定罪同被判囚嘅社運人士，仲話會向佢哋嘅家人提供支援，有評論認為「學聯」成立基金係「百份百鼓勵違法抗爭」；而囍雨就非常好奇，「學聯」部分收入來源來自學生畀嘅會費，而家佢哋攞咁多錢支援違法人士，佢哋有冇問過學生意見先？同埋佢哋突然有此決定，係咪借啲意攞學生錢幫啲「自己友」？

攞學生錢支援違法者？

對於學聯攞成百萬出嚟支援違法人士，囍雨第一個反應就係，佢哋錢從何來呢？根據囍雨喺網上睇到一篇去年嘅報道，話學聯雖然坐擁以千萬計嘅資產，但近年已經呈現入不敷支嘅狀態，可動用嘅資金得番百幾萬，雖然佢哋喺其他「基金池」有一定儲備，但將本來有其他用途嘅錢攞出嚟，一次過攞一百萬出嚟支援犯咗法嘅人，合唔合理呢？

仲有，上年相繼有幾間大學退出「學聯」，而家「學聯」基本上只係剩番四間大學左右，「學聯」嘅資產理論上係由以前咁多間大專院校一齊儲落嚟嘅，而家「學聯」自己決定攞嚟幫違法人士，係咪「打茅波」呢？更重要嘅係，「學聯」嘅相當收入來源係來自各院校成員繳交嘅會費，佢哋攞學生啲錢嚟用，佢哋有冇全面諮詢學生意見，定係佢哋見好多被判有罪甚至坐監嘅人係「自己友」，所以未有學生授權就攞錢出嚟畀人？

羅冠聰、周永康皆曾為學聯成員

對於「學聯」突然話要攞學生啲錢嚟幫啲違法嘅所謂「抗爭者」，囍雨即刻諗起「學聯」前秘書長周永康同羅冠聰、前副秘書長岑敖暉同佢女友兼同樣係「學聯」前副秘書長何潔泓；「學聯」話要出錢幫啲違法人士，係咪慷他人之慨、為「自己友」度身訂造支援計劃先？仲有，囍雨上網睇「學聯」「抗爭者支援基金」嘅內容，見到基金管理委員會成員包括「立言香港召集人」張秀賢，但張秀賢自己先因為「違法佔領」畀人告「公眾妨擾罪」，咁張秀賢會唔會自己批錢畀自己架？

凡此種種，實在教人懷疑「學聯」係借啲意攞學生錢嚟幫自己友；尤有甚者，佢哋犯法唔係預咗要承擔罪責嘅咩，乜而家唔認罪仲想攞學生錢打官司咁得意呀？

原圖：stheadline