「暴力王」梁天琦同黃台仰嘅旺角暴動案會喺明年年初開審，本來沉寂一時又話自己驚嘅梁天琦，近幾個月開始喺政壇活躍番，最近仲飛埋去英國同當地政客羅哲斯（Benedict Rogers）合謀「唱衰香港」。根據傳媒報道，梁天琦聲稱「一國兩制」保護香港嘅希望已經幻滅，仲話西方社會冇留意香港公民社會追求民主嘅困難愈來愈大。囍雨好質疑，梁天琦係咪覺得用暴力，都係公民社會體現嘅方式之一呢？其實好似佢咁嘅疑犯，去到任何國家嘅公民社會都會唔受歡迎先啱喎！

一國兩制正正是保護傘

全力唱衰「一國兩制」，基本上係盲反派一致嘅語調嚟架喇，不過梁天琦話「一國兩制」保護唔到香港，囍雨就相當唔同意，查實香港市民包括梁天琦本人，都一直受緊「一國兩制」保護；大家諗下，梁天琦一直喺香港鼓吹「港獨」，撇除佢有冇干犯香港嘅刑事罪行，如果冇「一國兩制」嘅保護傘，佢可以咁高調喺度宣揚「港獨」，而完全不受約束甚至唔會畀執法部門拉？唔好玩啦，其實最受「一國兩制」保護嘅，就係梁天琦呢班借香港言論自由而胡作非為嘅政客！

公民社會也不容許暴力

至於有關公民社會嘅說法，囍雨唔肯定梁天琦到底明唔明白公民社會係咩一回事，但囍雨無論係讀書抑或投身社會工作，理解到嘅公民社會係指市民可以喺自由嘅環境下組織、結社，參與自己有興趣加入嘅公民組織；但參與公民社會，同容唔容許有暴力行為，係兩回事，梁天琦可以喺公民社會宣揚、爭取民主，但咁唔代表佢同黃台仰等人可以訴諸暴力。囍雨甚至認為，梁天琦等人嘅暴力行為，係破壞到公民社會嘅和諧、和平，梁天琦如果仲有啲良知，就唔好自己犯錯仲諉過於人啦。

事實上，梁天琦講咁多歪理，好可能都係想主導輿論，向公眾甚國際表示自己係受害者，但呢啲行為明顯顛倒是非。如果梁天琦真係咁有道德勇氣，佢有冇向旺角暴動其他被告提供支援？佢有冇就旺角暴動向支持者甚至社會道歉？囍雨就唔係好覺喇！一個涉嫌犯罪又唔想認罪、做錯又唔想負責嘅政棍，喺香港甚至國外爭取「道德高地」，識得笑，其實真係幾好笑！

原圖：takungpao