為咗反對高鐵「一地兩檢」呢項民生議題，到底盲反派可以去到幾盡呢？事實係，可能係「無窮無盡」。尋日立法會鐵路事宜小組選正、副主席，公民黨陳淑莊竟然咁都要搵機會「拉布」，無啦啦發言話希望能夠爭取議員參觀高鐵西九龍站，又話要有官員陪同講解；嗱嗱嗱，本來呢個要求亦無可厚非，但大家如果唔健忘，應該記得之前盲反派議員曾經集體杯葛參觀西九龍站，乜陳淑莊咁快唔記得呀？

陳淑莊「打倒昨日的我」

其實早喺今年八月初，即係差唔多三個月前，港鐵已經安排過全體立法會議員去西九龍站，不過當時盲反派玩集體杯葛，其中陳淑莊黨友、即係公民黨黨魁楊岳橋甚至形容，參觀高鐵總站安排是「本末倒置」，因為未釐清「一地兩檢」法律問題就去參觀，完全冇意義喎。

楊岳橋大律師話「無意義」喎，咁因乜陳淑莊尋日又要求參觀西九龍站呢？老老實實吖，盲反派一直都話特區政府所提出、關於「一地兩檢」嘅法律依據「站唔住腳」，即係喺佢哋眼中，「一地兩檢」法律問題係「未釐清」啦，陳淑莊尋日建議參觀西九龍站嘅動機，真係好令人質疑。唔通，陳淑莊想連委員會會議都「拉布」？建制派議員睇穿佢想點，最後梗係冇理佢啦。

盲反派不敢親身參觀

查實八月初參觀西九龍站嘅時候，已經有評論話，盲反派唔肯參觀，係因為怕搞到自己都唔信自己所講嘅大話，好似嗰啲乜嘢「可以隨便捉人入內地口岸區」呀、「一國兩制」蕩然無存呀咁，正常人現場睇過都唔好意思再講出口，盲反派為咗唔想畀傳媒問親身感受，所以咪索性玩杯葛，做個掩耳盜鈴嘅「笨賊」囉。

放棄「拉布」 還市民便利安排

以公民黨陳淑莊等人為首嘅盲反派，一直將「一地兩檢」視為佢哋嘅政治籌碼同彈藥，認為呢個民主議題可以成為佢哋「炒作」攻擊中央同特區政府嘅武器，可惜香港市民普遍唔BUY佢哋，深受盲反派信賴嘅「港大民意研究計劃」民調亦顯示，大部份市民都支持通過「一地兩檢」，好心佢哋就唔好再咁多小動作，切切實實審議「一地兩檢」，落實呢項等市民可以極度便捷往返內地嘅交通安排啦！

圖片來源：港鐵網頁、星島日報