有時候，囍雨都幾佩服盲反派班議員，因為佢哋指鹿為馬嘅功力，常人真係拍馬都追唔上；好似「一地兩檢」議題咁，明明大部分市民都支持，佢哋又講到民間反對聲音好大，陳淑莊仲話政府想「強姦民意」、「製造假民意」，當自己完全睇唔到過半市民支持「一地兩檢」咁，呃人之餘仲呃埋自己！講緊邊個？咪就係公民黨立法會議員陳淑莊囉！

盲反派「強姦民意」？

政府喺立法會提出高鐵「一地兩檢」嘅無約束力議案，盲反派「拉布」拖延就梗架喇，不過盲反派班人話政府想透過無約束力議案「強姦民意」，囍雨就唔認同喇！根據陳淑莊嘅講法，佢覺得政府「強姦民意」或者「造假民意」，囍雨唔知陳淑莊係太善忘，唔知道好多民調都支持「一地兩檢」？定係陳淑莊覺得，佢哋盲反派嘅睇法就係民意，唔駛理其他市民點諗？

囍雨估計陳淑莊班人嘅套路，可能會話啲民調由政黨等做，唔係好準；但囍雨想講，喺一眾進行「一地兩檢」嘅民調機構當中，有報章係委託大學嘅調查機構去做，仲要係盲反派成日引用數據嘅「港大香港民意研究計劃」；佢哋而家眼見市民支持「一地兩檢」但視而不見，先至係真真正正嘅「強姦民意」！

既是無約力議案 又何須拉布？

誠如陳淑莊所講，政府今次提出嘅「一地兩檢」議案，根本只係無約束力議案；如果議案係咁無關重要，盲反派班人咁「努力」喺一個無約束力議案「拉布」，係咪好「傻豬」呢？如果最後立法會投票都係會通過有關議案，盲反派而家不斷「拉布」，其實係會影響埋之後嘅民生議案架喎；盲反派明知結果一樣而「拉布」，完完全全就係以民生脅逼政府。

早前，有盲反派因為要反對修改《議事規則》，講到明會「拉布」拉到出年三月，囍雨真係想像唔到，如果立法會有幾個月時間陷入停頓，後果會係幾咁嚴重！今日囍雨睇報道，見到有文章指盲反派費事玩得咁盡，會喺財委會用盡時間後畀兩個關乎露宿者之家同公務員加人工嘅議案過左佢！其實，佢哋如果都知道自己玩得盡，直頭應該即刻收手啦！

原圖：RTHK