因為衝擊政府總部被判入獄嘅「雙學」成員黃之鋒同羅冠聰獲准保釋等候上訴，坐咗兩個幾月監，一步出法院黃之鋒就話，監獄要求服務命令，好多時長官意志凌駕囚犯意志，又質疑點解囚犯一定要剪短頭髮；呢一種講法，即刻令囍雨諗起睇一啲監獄電影嘅時候，啲阿Sir會同啲囚犯講，「你哋而家係嚟受罰，唔係嚟度假！」囍雨真係非常好奇，到底黃之鋒係知唔知「坐監」係乜嘢事呢？

坐監就是規訓 是改造

囍雨喺學生時代睇過一本叫《規訓與懲罰─監獄的誕生》嘅書，入面講到監獄就係一個令到犯人變得柔順（Docile）、服從命令嘅地方，從而改造、改善犯人，希望消除犯人再犯罪嘅意圖，學會守法循規，重新成為有利社會嘅市民或者生產者。一言以蔽之，監獄就係要令犯人改過，無論係紀律或者身體嘅鍛鍊，都係方法之一。

黃之鋒可能喺出面「串慣」、「惡慣」，覺得坐監都要享受自由意志，或者佢打從心底就唔覺得自己係犯人，所以對監獄入面嘅種種規訓或者規矩都睇唔過眼；不過，囍雨就覺得佢唔好因為自己係所謂嘅「民主鬥士」，就可以坐監都有「特權」，如果坐監係咁自由、無拘無束，咁監獄又點起到懲罰、改造作用先？如果佢唔想坐監，最好嘅方法就係唔好再犯法，唔好再以政治為名玩暴力衝擊！

黃之鋒明顯未悔改

好明顯，黃之鋒等人未可以從短暫嘅牢獄生涯中汲取教訓，一行出法院無耐就話自己無悔參與違法嘅「佔中」行動，話未來會繼續抗爭，仲聲稱所堅持嘅係「非暴力抗爭」。睇嚟黃之鋒到而家都未覺悟，佢同「雙學」其餘兩子之所以被判入獄，唔係因為佢哋示威、遊行，係因為佢哋嘅衝擊行為有暴力成份，當時佢哋衝擊政總亦有十名保安受傷，佢仲覺得自己係「非暴力抗爭」？難道佢哋連監都坐過，仲係覺得自己係「政治犯」、無做錯？

「雙學三人」不斷「英雄化」自己嘅暴力衝擊行為，為嘅就係洗脫自己違法施暴嘅罪名，繼續以民主鬥士自居。其實，社會並無反對佢哋爭取民主，只係希望佢哋守法循規去爭取！