雖然「雙學三人」黃之鋒、羅冠聰以及周永康已經被判監一段時間，但坊間對於檢控部門以至法庭嘅攻訐好似仲未平息。其實，已經有唔少法律界權威包括前刑事檢控專員江樂士、前廉政專員施百偉都發聲捍衛過香港法治同法院；最近，連英格蘭及威爾斯前刑事檢控專員、牛津大學瓦德漢學院院長麥當納（Ken Macdonald），都接力發聲，話攻擊法治嘅人，有可能破壞緊佢哋聲稱要捍拒嘅價值。其實又啱喎，盲反派呢班人唔係一直要捍衛法治嘅咩，乜判決唔合心意就要「反枱」？真係幾諷刺喎！

暴民統治令法治蕩然無存

查實今次已經唔係麥當納首次「為港發聲」，就上個月初之嘛，佢已經就「雙學三人」案撰文，力挺律政司嘅上訴過程公開公正、尊重權利且符合法律，直言有人詆毀法院係「可悲嘅錯誤」；麥當納最近接受香港律師會刊物訪問時亦重申，香港司法機關獨立，忠於法律規定的正當程序，理應得到支持，而即使對裁決不滿，亦唔應該變為攻擊檢控單位嘅上訴權或法官個人誠信，否則就係攻擊法治本身，而進行呢啲口舌攻擊嘅人，有可能破壞他們聲稱要捍衛嘅法治。

諗深一層，麥當納又真係講得好有道理，盲反派班人一向最鍾意講嘅，離不開話要爭取民主、守護法治之類嘅口號，好似高鐵「一地兩檢」問題咁，明明係便民措施，佢哋又話法律上如何如何不可行；但調番轉「雙學三人」違法衝擊政總，班盲反派又話係「政治檢控」，佢哋所謂嘅守護法治，前提就係佢哋可以違法，其他人就唔可以，都幾雙重標準下！

違法佔領後攻訐法治

盲反派嘅雙重標準、自我矛盾特色，囍雨相信佢哋會一直發揮落去，尤其係違法佔領一眾主事者被告上法庭，盲反派一定會喺法庭內外道盡破壞法治嘅說話，例如「政治檢控」、「政治打壓」甚至「威權法庭」等等，總知就要Discredit法庭，等市民覺得佢哋無辜得嚟又好正義咁！

其實，如果班盲反派犯完法後勇敢承擔罪責，又無諉過於人，囍雨都覺得佢哋仲有少少風骨，值得尊重下；但而家一個、二個犯完法想「找數」仲要抹黑番法庭，呢啲言行令人不齒之外，更加會覺得香港呢班所謂「民主派」真係冇乜希望，因為由頭到尾，佢哋都只係識鬧事嘅100%政棍！

原圖：Takungpao