由前日到噚日，盲反派喺立法會總共點咗27次人數，會議去到噚日下晝終於因為人數不足而流會。會議期間提出點人數最多嘅民主黨許智峯，到咗今日仍然講大話，話自己都唔想流會，但喺果一刻要做一個決定咁話（都唔知佢講乜！）。老實講，真係唔想流會的話，許智峯點解又要要求點人數之餘，臨尾見到差一個人，仲故意行出會議廳搞到流會呢？明明就係「拉布」、想流會，對住傳媒就睜大眼講大話，認真「低莊」。

展開拉布戰 議會陷空轉

囍雨覺得，盲反派可以對政府想先討論高鐵「一地兩檢」議案有唔同意見，亦有權唔認同建制派想修改嘅《議事規則》；不過，呢啲都唔係盲反派「拉布」，以民生威脅政治嘅理由。噚日立法會下晝明明係審議緊《能源效益（產品標籤）條例》議案，絕對係一個關係到民生嘅議案，點解許智峯繼續要求點人數，仲要到鐘聲響起14分鐘先故意離場，令會議因為爭一個人流會呢？

所以話，盲反派中人自稱唔想「拉布」，根本係一派胡言，唯一合理解釋，就係佢哋想「拉布」，短期而言就係要拉死「一地兩檢」議案，甚至犧牲民生項目亦在所不惜。至於長遠啲嚟講，就係要拖延立法會各會議時間，等建制派修改《議事規則》嘅計劃胎死腹中！不過，佢哋係唔係都「拉布」，只會令市民睇清楚修改《議事規則》嘅必要，支持建制撥亂反正！

誰先不按規矩辦事

又要「拉布」又要縮，都唔緊要喇，但許智峯仲要繼續亂吹，話如果要講規矩，係政府、建制唔按規矩在先，例如DQ幾個前議員等等。大哥，講唔守規矩，事實係幾個被DQ嘅前議員唔依法宣誓在先喎？無人違法，政府又點執法呢？講唔守規矩，點睇都係盲反派班人啦！仲有喎，喺立法會入面，盲反派就可以要求政府調議程，仲要係用「拉布」做威脅果隻，但又唔畀政府因應需要調動議程，又係咩道理呢？

社會成日話要「大和解」，講真，就算而家到特首林鄭月娥上場都好，盲反派咪又係會「拉布」、喺議會搞事。囍雨覺得，可以照向班盲反派伸出橄欖枝，但喺修改《議事規則》以至「一地兩檢」等問題上，真係半步都唔可以讓呢班人，否則後果難料！

原圖：hket