為咗高鐵能夠趕及喺明年第三季通車，政府決定先抽起立法會入面有關《印花稅》修訂嘅條例草案，等立法會先討論有關高鐵「一地兩檢」嘅無約束力議案。本來先畀事關重大嘅「一地兩檢」議案先行都好正路，偏偏盲反派十分唔合作，噚日仲喺立法會上面「拉布」、「點人數」，搞到個休會待續議案到會議結束都未表決到，有盲反派更揚言要「點人數」點到出年三月。其實，班盲反派咁搞法，係咪等於話畀香港人知，修改《議事規則》、防「拉布」真係刻不容緩呢？

不斷點人數 差一點流會

無論盲反派點抹黑都好，囍雨始終認為高鐵「一地兩檢」唔係一個政治議題，呢個涉及香港未來發展、對外交通網嘅項目，根本就係民生、以民為本嘅項目；如今佢哋未開始傾「一地兩檢」就「拉布」，根本就係連傾都唔想傾，甚至唔想高鐵如期通車。睇番佢哋噚日嘅表現，喺會議上先後提出16次點人數，其中有一次更爭啲搞到流會，再加上民主黨胡志偉話會「拉布」拉到出年三年補選，可見立法會又陷入咗新一場「拉布戰」入面。

其實，囍雨就覺得盲反派係唔係都「拉布」嘅行為非常愚蠢，事關建制派而家提出修改《議事規則》防「拉布」，財委會主席陳健波又計劃推出「主席指引」，盲反派要搶佔道德高地，最好嘅方法就係用行動話畀市民聽佢哋唔會亂嚟。但而家佢哋咁樣搞一搞，仲話要搞到出年三月，相信好多議案都有可能畀佢哋「拉倒」，市民見到咁嘅情況，只會想建制派快啲修改《議事規則》！

盡快修改《議事規則》

盲反派冇政治智慧，已經唔係今日先知嘅事，當年政府推銷政改，佢哋一樣唔識「袋咗先」，再搵機會進一步爭取改善方案。情況嚟到今日亦一樣，只識用極端方法想同政府、建制甚至市民「一鑊熟」，大不了犧牲晒所有民生議案；呢一種博奕手法已經唔係你贏我輸或者我輸你贏嘅「零和遊戲」，而係要搞到全香港同佢哋一齊輸嘅「負和遊戲」。免得議會繼續磋跎歲月，修改《議事規則》，勢在必行。

原圖：stheadline