近日議會就成立創新及科技局鬧得熱哄哄，逢事必反既「長毛」梁國雄又拉布，搞到會議尋日結束都未正式討論。無論係業界定係市民大眾，其實有晒共識，廣男覺得長毛拉布既所謂理據根本就站唔住陣腳，一邊話支持創科局，一邊又話信唔過梁振英所以拉布，做議員應該以事論事，如果對人不對事，咁就唔好做議員啦！

創科局受拖累，受害既只係科技業界？大錯特錯！受害既係全港市民先真，作為一個國際城市，金融、服務業發達，但科技發展停滯不前，根本一啲都唔合理。事實上，各行各業都需要科技支援，如果香港下下靠輸入技術、科技，唔單只喪失更好發展既機會，仲係不斷地送錢畀人使！

想當年，香港與韓國、台灣、新加坡並列為亞洲四小龍，今日韓國有三星，台灣有HTC，香港有咩？廣男咁講，其實唔係想講香港無科研，而係香港就算有科研成果，將成果產業化既過程都可能流諸海外；好似之前有科大生發明飛行攝影機，威到連名導演Michael Bay都《變形金剛4》用嚟拍飛翔鏡頭，但係發明既年青人開頭都係喺深圳開公司做研發，香港名副其實係「有種子，無土壤」。

講到種子，當然不得不提「光籤之父」高錕同遺傳學家徐立之，其實香港科研人才輩出，但一直無好既產業政策畀從事科技業既人去好好發展，結果一個個本來可以為香港帶來極大貢獻既創新、科技猛人都遠走高飛，明明本身就係香港仔，搞到要去外國發展，被迫做埋番鬼仔，你話可惜唔可惜？

可能而家有啲人仲係覺得無創新及科技局唔會死，廣男想大家認真動腦筋諗下，而家香港只係依賴某啲大產業，若然touch wood發展唔好、受到挑戰或者受環球經濟衝擊，全港市民都即刻遭殃。追求產業多元化，情況就好似高明既投資者會分散投資，藉此減低風險一樣。今時今日，全球都放眼於創新同科技發展既時候，好心啲「盲反」政府，日日「拉布」，靠害市民既政客「行開啦」！

原圖：網絡圖片