立法會「拉布」問題越嚟越嚴重，社會一直有聲音要求修改《議事規則》，以免立法會淪為「只求政治、不為民生」嘅表演場地。就喺一班建制派議員聯署要求修改《議事規則》、財委會主席陳健波計劃推出「主席指引」嘅時候，盲反派代表莫乃光指聲稱被DQ議員係因為「黑哨」、「政治檢控」所以「被趕離場」，搞到佢哋唔可以喺「分組點票」守住，仲話唔排除會喺財委會「反枱」。言下之意，莫乃光係咪暗示，立法會議員就唔駛守法、依法宣誓先？如果防止「拉布」阻民生議案都要「反枱」，莫乃光係咪想與民為敵？

修改議事規則乃義之所在

反枱？反咩枱先？今日喺立法會財委會議程上面，有咩係有爭議或者政治性議題？冇的話，到底你反邊個張枱？老實講，囍雨唔單止贊成修改《議事規則》，仲建議立法會應該盡快做呢件事，點人數、大量修正案、拖延式發言，都唔知磋跎咗議會幾多時間；喺過去一年，唔少民生議案好似公屋、骨灰龕等民生議案都畀盲反派「拉死」咗，有建造業工人工作量減少，甚至出現一入行就失業嘅慘況。如果盲反派係為民生，點會明知影響民生仲要拉布？點會明知修改規則有利議會進程都要反對？唯一解釋，就係佢哋始終都係諗住以「拉布」為武器，喺有「需要」時以「拉倒」民生議案嚟脅迫政府！而家建制派想防「拉布」都唔畀，莫乃光擺到明就係與民為敵，政治凌駕一切。

的而且確，由於幾個前議員被DQ（撤銷議員資格），如果而家有立法會議員提出修改《議事規則》，喺分組點票嘅情況下好可能會通過。但莫乃光話幾個前議員被「黑哨」、「政治檢控」下「趕離場」，係講唔通嘅。幾個前議員被DQ係事實，盲反派喺分組點票下可能會唔夠票都係事實，但幾個前議員被DQ，唔係咩「政治檢控」，而係佢哋違反相關法律！

議員更要守法

無論係梁頌恆、游蕙禎以至梁國雄等也好，佢哋雖然係民選議員，至少攞住數以萬票入立法會，但立法會議員係咪要依法宣誓呢？《基本法》、《宣誓及聲明條例》唔係一紙空言，唔宣誓效忠特區，又點成為議員？情況等於證人上法庭做證，都要先宣誓以證明自己會從實作供嘅決心；議員要先宣誓再就職，幾乎都係國際標準，莫乃光如果覺得被DQ議員冇問題，佢又夠唔夠膽喺自己宣誓嘅時候玩嘢呢？唔係佢哋違規在先，又點會被DQ呢？莫乃光話佢哋被吹黑哨，係佢哋掩飾罪行，而甘冒侮辱法庭判決之險？

其實莫乃光講咁多，都係想繼續為「拉布」嘅盲反派護航，但莫乃光唔好忘記，當年盲反派喺創科局成立嘅問題上「拉布」，佢都係半個受害者；如果佢繼續助紂為虐，小心「自食其果」，下次班盲反派又想「拉死」同佢有關嘅議案呀！

原圖：stheadline