非暴力抗爭，一直係盲反派擁抱嘅「政治口號」，不過由始至終都係得個講字，無論係「雙學三人」衝擊政總、違法「佔中」等，統統都充滿暴力，盲反派一直都只係利用「和平抗爭」做口號，呃啲青年人去衝。近日，「違法佔領」發起人之一陳健民似乎終於「鬼拍後尾枕」，喺出席大學一個講座時坦言，「和理非」抗爭無效，要進行「勇武抗爭」咁話。陳健民身為中大社會學學者，喺大學叫人「動武」，會唔會有啲問題呢？

陳健民不再「和理非」？

據傳媒報道，陳健民日前聯同另一個「違法佔領」發起人朱耀明出席中文大學一個講座，話自己即使坐監都會喺獄中繼續寫文「影響」年輕人，又聲言「和理非」抗爭已無實效，應改為進行「勇武抗爭」。言下之意，係咪即係一直聲稱「和平、理性、非暴力」嘅「佔領三人組」會全面擁抱暴力，甚至會叫青年人用暴力方式反對政府？咁日後佢哋會唔會聯同黃之鋒等人搞「二次佔中」？陳健民真係應該講清講楚！

事實上，囍雨一直都唔認為「佔領三人組」佢哋係「和理非」，大家諗下「違法佔領」嗰時發生過咩事？一幕幕衝擊、攻擊警察嘅場面，有示威者襲警，甚至過百個示威者圍住兩、三個警察「搶犯」、有人襲擊佢哋所講嘅「和理非」，其實只係氹班年青人「入局」，然後任由佢哋去衝，自己就坐收「政治紅利」。唯一唔同嘅，就係佢哋以前都會扮「和理非」，而家就擺明車馬煽動暴力咁解啫。戴耀廷前排更話要搞獨立添！係咪露饀？大家是懂的！

坐牢能讓人生更完整？

至於講座另一講者朱耀明，佢嘅發言其實一樣咁「精彩」，佢話喎：「坐牢能讓人生更完整」就算自己年過七十坐監都「無怨無悔」咁話。哈，朱耀明會之後上庭會唔會認罪、不抗辯，坦蕩蕩咁坐監，「令自己人生更完整」呢？答案係唔會囉，呢個「違佔」始作俑者已經決定打官司打到底啦！

朱耀明呢種講法，其實同公民黨楊岳橋嘅「案底令人生更精彩」嘅說法如出一轍，一樣講到「坐監」、「案底」等令人生更「精彩」、「完整」，試問如果真係咁「精彩」，違法「佔中」班人又點會一個又一個都唔想認罪呢？講到尾，佢哋就係想營造一種因政治理由而違法係好「有型」嘅感覺，不過當佢哋「型」完之後有人叫佢哋「找數」，佢哋會答大家，「我諗諗先啦」！

原圖：RTHK