正喺監獄服刑「找數」嘅「香港眾志」秘書長黃之鋒，日前再次被法院裁定因「佔旺」清場時，阻撓執達吏執行清場職務，「刑事藐視法庭」罪成。呢位慣犯日前喺監獄入面寫咗封「家書」，話無後悔當初搞「佔領佔領」嘅決定，繼續口口聲聲自稱「政治犯」之餘，仲話「等待一場比傘運規模更大的運動換來普選」。佢咁講法，係咪呼籲搞「二次佔中」呢？因為犯法斷正入獄仍不知悔改，繼續厚住臉皮自稱「政治犯」，手法之低下，實在無出其右。

法治完好無缺

喺黃之鋒呢封所謂「家書」裡面，少不免當然會踩政府兩腳啦，佢話喎，港英殖民地年代令人「誤信缺乏民主居然會有健全法治」，言下之意即係話而家香港法治有問題啦！其實，無論係黃之鋒在內嘅「雙學三人」，抑或係拒絕／忽略誓言而被DQ嘅六名前議員，佢哋違反咗法律而政府依法執法，呢啲先係真正法治嘅表現，乜唔通政治或者法院因為考慮到政治理由，決定唔向違法嘅人提控或者判其有罪，咁先算法治？鋒哥哥，唔好玩啦。

老老實實，囍雨對於黃之鋒等人一再聲稱自己係「政治犯」非常反感，佢哋對於「政治犯」嘅定義，大概就係盲反派因為政治理想而被告甚至入獄，甚至政府因為「政治理由」而檢控佢哋導致佢哋坐監；但呢種講法根本係大錯特錯，佢哋唔係因為合法集會以至遊行而被告，而係佢哋無視法治作出違法甚至暴力嘅行為，試問和平集會點會有衝擊仲要令到保安受傷，唔該唔好再嚟呢一套啦！唔好以為大話講咗100次就會變成真話！呢一套謊言唔單止囍雨聽唔慣，相信廣大市民都唔會相信！

想搞「二次佔中」？

對於黃之鋒嚟講，由搞「反國教」開始，到搞違法「佔中」果時，佢可以話係到達政治生涯嘅顛峰期，「佔中」時期連國際性雜誌都攞佢嚟做封面故事，所以佢期望香港有一場更大嘅「運動」，佢當然以為搞大件事會對佢自己政治前途有利，但佢有冇諗過「佔中」呢場「運動」對於香港嚟講，係場災難，不可一不可再！香港人唔需要黃之鋒攞市民嚟做籌碼要脅政府；如果黃之鋒真係「覺醒」，唔該就唔好破壞香港人生活，再損害香港人嘅福祉喇！爭取民主，從來就係一場智慧嘅較量，盲目破壞以為自己會成功，最終害倒他人，又害到自己！

原圖：Takungpao