建制派立法會議員近日指出要修改財委會嘅《議事規則》，藉以堵塞「拉布」漏洞。喺呢個時候，竟然有唔少盲反派政界人士跳出嚟話，建制派唔應該咁做架，咁做係乘人之危，如果建制派想改落行政立法關係，就放棄修改議事規則啦！聽到呢啲所謂理由，唔知各位仍然保持清醒嘅市民有咩睇法呢？

修改規則為「問政」

囍雨為人好公道，修唔修改《議事規則》，又或者講，應唔應該修改，要視乎修改之後會唔會收窄議員問政、議政嘅空間。根據財委會主席陳健波嘅說法，佢同其他建制派議員認為需要修改嘅規則，並唔係阻止盲反派議員發言，相信，佢哋就係想畀更多時間各黨派議員可以發言、問政，先至要修改《議事規則》。

以財委會為例，近年最常被某部份議員利用嘅規則，就係所謂嘅「要求休會」同埋「中止待續」。議員有權喺會議上提出呢兩項要求，直接間接就係令到財委會唔可以繼續傾議程上嘅其他項目。

修改規則後發言機會增

老老實實，「中止待續」都叫做仲有少少理據，即係話，今次唔傾呢個項目住喇，下次返嚟傾過啦（大概意思），而家大家傾住其他項目先；但「休會」呢？如果通過的話，就係即時散會，議程上所有項目，有爭議又好、冇爭議又好，全部唔傾，下次復會先算啦。喂，呢種做法、呢種權力，乜稱得上「問政」咩？你要求「休會」喎，即係乜都唔傾喎，咁問乜嘢政呀？

陳健波講得好明白，會議時間係應該用嚟向政府官員提質詢嘅，如果真係修改到財委會嘅規則，佢會安排更多時間畀議員向政府官員發問。更多時間發問喎，唔係少咗喎，點解盲反派議員認為會收窄咗佢哋問政空間先？除非佢哋所謂嘅「問政」就係「拉布」啦，咁又唔同講法。

所謂「乘人之危」只是藉口

至於所謂「乘人之危」，呢種說法其實仲好笑。如果盲反派係因為先後有六個前議員被褫奪議席就認為建制派係「乘人之危」的話，咁囍雨真心想問，咁係唔係要立法會停頓、休會，等到補選晒六個議席之後先開會，咁先唔係「乘人之危」呢？根據盲反派邏輯，而家所有會議、有任何決定，其實都係「乘人之危」喎，因為立法會都唔齊人，而家得六十四個議員之嘛！

所以話呢，盲反派唔好再歪理多多呃市民啦，要做嘅事就應該即刻做，咁先係立法會議員嘅應有之義。話人「乘人之危」？你班人撫心自問嗰六個DQ議員自己做過乜、係唔係有「犯法」先啦！

圖片來源：大公報